SDHK-nr: 6660

Omnibus presens scriptum cernentibus Laurencius Iarundason in Vggastum salutem in Domino sempiternam. Tenore presencium recognosco me de discreto viro Iacobo in Marsta, exactore prouincie Belling, quatuor solidos terre in Vggastum et duas oras terre in Marsta cum tribus marchis denariorum, quas addidit predictis duabus oris terre, pro decem solidis terre in Akyrby racione concambii legaliter habuisse, mihi meisque heredibus predictos decem solidos terre alienans, sibi suisque heredibus approprians perpetuo possidendos. Istud autem concambium erat factum coram testibus fidedignis, dictis fasta, publice aduocatis, vidilicet Olauo in Aløpe, Ragualdo ibidem, Iuan in Eskelundum, Iohanne ibidem, Olauo ibidem, Haquino in Hiælmestum, Magno in Berghum, Thoma in Croxta, Iohanne in Syþyrby, Iohanne in Høxta, Iacobo ibidem et Berone ibidem vnacum duobus viris dictis vidhyruarumæn, silicet Iohanne in Rørby et Hemmingo in Gystum, qui ad sepedictum concambium erant legaliter nominati. In cuius rei testimonium sigillum discreti viri Ioon Pætersson, dicti hæræzhøfþingiæ prouincie Belling, vna cum sigillo proprio presentibus est appensum. Scriptum anno Domini m°cc°c quinquagesimo tercio in crastino beate Lucie virginis.