SDHK-nr: 5338

Omnibus presens scriptum cernentibus Petrus dei gracia lundensis archiepiscopus suecie primas. salutem in domino sempiternam. Constare volumus vniuersis. quod sub anno domini M CCC XL sexto. in crastino beati laurencii martiris gloriosi. constitutus personaliter coram nobis lundis. vir discretus dominus magnus nicolai nostre lundensis ecclesie canonicus ad vnum altare in ecclesia nostra lundensi. in anime sue remedium. de nostra et nostri lundensis capituli voluntate et consensu construendum. cuius presentacio et collacio ad nos et nostros successores lundensis ecclesie archiepiscopos spectabunt pleno jure. omnia bona sua in skreplinge østre ex orientali parte riuuli videlicet vnam curiam in qua residet kanutus. daturus sex oras denariorum et marcham annone Jtem aliam curiam. in qua residet trugillus petri. habens in estimacione Jugum equinum et dimidiam marcham annone. de qua soluit dimidiam marcham annone et tres marchas denariorum Jtem terciam curiam in qua residet trugillus asceri. habens jumentum equinum. vaccam. et duas oras annone in estimacione de qua soluit III marchas denariorum Jtem quartam curiam. in qua residet michael bridæson. habens in estimacione quatuor marchas denariorum et quatuor solidos annone de qua soluit duas marchas denariorum Jtem vnam coloniam in qua residet Cristina. soluens sex oras denariorum. Cum domibus agris pratis pascuis, estimacionibus predictis et ceteris ipsorum bonorum pertinenciis. ad vsum rectoris dicti altaris construendi Et pro anniuersario suo in choro dicte nostre lundensis ecclesie annuatim celebrando vnam curiam suam ex orientali parte riui in skræplinge østre situatam de qua dantur tres marche denariorum cum omnibus eiusdem curie pertinenciis. in sinum nostrum tradidit et scotauit jure perpetuo possidenda Ad cuius eciam altans dotacionem dominus johannes dictus bunkæflo. rector ecclesie akathorp. eodem die coram nobis lundis constitutus. propria in persona. bona sua paterna. videlicet duas curias in arrøghe cum estimacionibus scilicet duabus oris annone duabus vaccis. valentibus quatuor marchas denariorum et omnibus aliis ipsarum curiarum pertinenciis. de quibus curiis dantur due ore annone et quatuor marche denariorum ac vnum molendinum aereum in methlæstegrafføghe. et fundum in quo edificatum est ipsum molendinum cum terra et via adiacentibus, tradidit et scotauit. possessione perpetua retinenda. fide data promittens vnam curiam lundis pro residencia rectoris altaris eiusdem comparare. Jn quorum omnium testimonium. sigillum nostrum. vna cum sigillis dilecti capituli nostri lundensis et dominorum. magni niclesson canonici ac johannis bunkæflo predictorum presentibus est appensum Actum et datum anno die et loco supradictis.