SDHK-nr: 5622

Omnibus presentes litteras inspecturis Nicolaus Abiornsson, Kætillus Glysing et Eringislo Sunasson milites salutem in Domino sempiternam. Quia nobilis miles dominus Wlpho Abiornsson felicis recordacionis in extremis agens bona sua omnia et singula mobilia et immobilia in Windestadhum Lincopensis dyocesis sita cum domibus, agris, pratis, siluis, pascuis aliisque suis pertinenciis quibuscumque, mobilibus et immobilibus, nullis penitus exceptis, pro salute anime sue legauit et legari decreuit testamentaliter piis locis, relinquens in ordinacione venerabilis in Christo patris et domini domini Petri, Dei gracia Lincopensis episcopi, ac nostra vna secum, cui ecclesie uel prebende, prout in testamento eiusdem domini Wlphonis lucide continetur, huiusmodi bona pro anima sua deputaremus communiter assignanda, verum nos de caritiua (C: caritatiua) ipsius domini Lincopensis episcopi prouidencia firmam spem et fiduciam gerentes, vt de dictis bonis taliter ordinare velit, sicut anime ipsius domini Wlphonis melius et consulcius viderit expedire, omnem potestatem nobis in hac parte commissam in eundem dominum episcopum transferimus, plenam sibi et liberam facultatem concedentes de dictis bonis, prout Deo et sibi placuerit animeque ipsius domini Wlphonis expedierit, ordinandi, promittentes nos per presentes gratum et ratum perpetuis temporibus habituros quicquid per eundem dominum episcopum super eisdem bonis fuerit ordinatum. In cuius euidenciam sigilla nostra presentibus sunt appensa. Scriptum Stokholmis anno Domini millesimo cccxl octauo in crastino ascensionis eiusdem.