SDHK-nr: 6020

Omnibus presens scriptum cernentibus Godstauus Byrghysson et Margareta Byrghysdothir in Domino salutem sempiternam. Tenore presencium constare volumus euidenter nos omnia bona nostra in Blædhinge sita, que nobis post obitum dilecte sororis nostre, Elene nomine, hereditario jure prouenerunt, Byrgero Niclisson, dilecto fratrueli nostro, cum omnibus suis pertinenciis, vbicumque situatis, annuisse penitus et dedisse, ita tamen, quod in patrimonium et non matrimonium maneant liberis de se procreatis vel hac racione, quod, si ipsum mori contingat sine liberis, extunc supradicta bona suis proximis heredibus paternatis(!) et non maternatis(!) in perpetuum cedere debeant jure perpetuo possidenda. In cuius rei testimonium sigillum meum vna cum sigillis discretorum virorum, videlicet domini Byrgeri Gregorisson, Johannis Gregorisson et Gudthormi Thorisson presentibus est appensum. Scriptum anno Domini m°ccc° quinquagesimo die sancti Laurencii martiris.