SDHK-nr: 16712

Iw erwerdighe gheistliche herre, her homeyster, do wy Margareta, koning Woldemars dochter to Denemarken, witlich als vmme den dach, des gheramet is to Kalmarn to holdende von euwir herlicheyt vnde vnsers sones koning Erikes weghene, dat wi dar vmme myt den euweren, de nu hyr by vns weren, spreken vnde hadden gherne gheseen dat de sulue dach hadde gheholden wurden by dem Oressunde, beyde vme ghemakes vnd meer anderer zake wyllen, des sich de euwern nicht vnderwinden wolden noch irluchten, als wie van en vornemen, se en hadden myt euwir herlicheyt dar ersten vmme ghesproken, ouch wyllet weten, dat de juncvrouwe, des konynges dochter van Engelande, alle daghe vormodende sy herwart to komende. Erlicher herre, werit moghelich, dat ghy denne suluen dar by komen wolden, dar bede vnse sone vnd wie ju gherne vmme; mach ower dat nenewiis ghescheen, so bidde wie, dat ghy de euwirn dar jo by senden wyllen, beyde vmme desser vorghescreuen zache willen, vnde dat vnse sone vnde wie ju vnde de juwen dar gherne seghen vnde weren vns willekomen, ouch dat se myt vuller macht dar quemen to sprekende vnd to endende de zúlfúen zache, als wie hopeden dat gy menen de euwirn scholden to Calmarn bringen, dar wy juer herlicheyt och wol eer vmme schreuen vnde ghebeden hebben, als wy noch gerne don, wente de vrede vnde vorword muchten allikewol staen als de staet. Wi hebben och den wendischen steden vnde juwen by desseme suluen synne ghescreuen vnde see bidden laten dat se de eren dar och to senden willen vppe den dach vnde stede, dar de juwen vormodende sint to komende, als voreschreuen steyt. Erlicher herre, betrachtet vnses sones, vnse vnde desser rike beste in dessen vorghescreuen zaken vnde alle andern, als he vnde wi juwer herlicheyt wol to louen, vnde latit it vnsen sone vnde vns deste vurdere keyn jw vnde de juwen vorschulden vnde welk erer gy nu leuest wyllen, dat man des vorescreuen daghes to Calmarn edder by dem Oressunde waren schole, als vorescreuen steyt, des scriuet vns juwen wyllen vnde enkit antvorde widder by desseme boden. Item erlicher herre hadde vnse sone nu also na ghewest, he en hadde desse vorgescreuen stucken suluen gherne schreuen juwir herlicheyt, de Gode vnseme heren bevolen sy to langen tiden. Scriptum in villa nostra Randerhús, anno Domiui mcd sexto, sabbato infra octauas corporis Christi.