SDHK-nr: 5595

In nomine Domini amen. Cum sanctissimus in Christo pater et dominus dominus Clemens, diuina prouidencia papa sextus, nobis Magno, Dei gracia Suechie, Norwegie et Skanie regi graciam de benignitate sua fecerit specialem, vt in singulis ecclesiis cathedralibus in regnis et terris nostris consistentibus vnam personam ydoneam semel nominare valeamus pro canonicatu et prebenda in qualibet ecclesiarum predictarum, cum vacauerint, canonice obtinendis, certum super gracia premissa executorem nobis concedendo, necnon in sex ecclesiis cathedralibus, quas duxerimus eligendas, singulas personas eciam ad dignitates, personatus et officia cum cura vel sine cura, prout littere ipsius domini pape, bulla plumbea bullate, super hoc, vt est moris, satis docent, nos dilectos nobis dominos Ringwidum de Sorundum ad dignitatem in ecclesia Vpsalensi, Johannem dictum liitlæ, canonicum Lundensem, pro canonicatu et prebenda ibidem, Nicholaum Marci, curatum in Malmøghium ad dignitatem in ecclesia Lyncopensi, Lambertum, curatum in Ludhgudhwi, pro canonicatu et prebenda ecclesie Lincopensis, Dagherum in Dalum pro canonicatu et prebenda ecclesie Scarensis, Johannem de Throso pro canonicatu et prebenda ecclesie Strenginensis, Borkardum de Rytro pro canonicatu et prebenda ecclesie Arosiensis, Nicholaum Asceri pro canonicatu et prebenda ecclesie Aboensis, Gunnonem de Rythaholm pro canonicatu et prebenda ecclesie Wexionensis, vacantibus vel proximo vacaturis, virtute graciarum huiusmodi nobis factarum, canonice obtinendis, tenore presencium nominamus, hoc saluo si premisse vel premissi dignitates, personatus, officia, Canonicatus et prebende eisdem dominis et nullis aliis debeantur seu deberi possint de jure, et in casu, quo reperiatur, quod dignitates, personatus, officia, Canonicatus vel prebende premissi vacantes vel proximo vacaturi, quos per se vel procuratores suos infra vnius mensis spacium, postquam vacacio huiusmodi ad ipsos seu ad ipsorum procuratores peruenerit, duxerint acceptandos, eisdem dominis non debeantur nec deberi possint de jure, extunc dignitates, personatus, officia, Canonicatus et prebendas proximo postmodum in ipsis ecclesiis vacaturos, que ipsis virtute gracie premisse competere et possint de jure deberi, acceptandi et sibi de premissis prouideri faciendi sine sui et juris nostri preiudicio, jus integrum et liberum in omnibus remaneat atque saluum. Quod vniuersis et singulis presentes litteras visuris vel audituris volumus esse notum apponentes sigillum nostrum eisdem in testimonium premissorum. Datum apud ecclesiam Grænnæ Lyncopensis diocesis anno Domini m°ccc°xl octauo feria secunda post dominicam palmarum.