SDHK-nr: 16776

Margareta Dei gratia Waldemari regis filia providis circumspectisque viris, etc., consulibus civitatum Thorun, Elbing et Dantzik. Na deme grote. Wy danken jw vor juwen vruntliken brieff, den gi uns latest sanden, unde dat gi unsen boden wol handelden. Unde willet weten, dat wy juweme heren, deme homeistere, nu eynen brieff gescreven hebben, ludende, alse desse ingeslotene copie inne holt. War vmme wy bidden, dat gi ene dar ane berichten unde dar truweliken to helpen, dat uns van den saken eyn gutlik antworde werden moge by dessem boden, unde dut unde bewiset jw in den saken unde umme Gotlandt unde Wisbu, also unse zone unde wy jw wol tolouen, unde alse gi willen, dat wy deste vurder umme juwen willen dun mogen. Unde ist sake, dat de here homeister wene to dage senden wil nu zomerlank, alse wy eme nu. schreven hebben, so latet jo de juwen medekomen, unde jo de ghenen, den de degedinge witlik siin unde daer er by wesen hebben. D$ar mede bevele wy jo Gode. Vordert dessen boden varlosen to uns mit eynem guden antworde van allen saken, d$ar bewise gi uns willen ane. Scriptum in Civitate Lundensi 1406 sabbato ante festum beati Martini episcopi, nostro sub secreto.