SDHK-nr: 2176

Omnibus præsentes literas inspecturis, Ericus et Waldemarus Dei gratia duces Svecorum. salutem in Domino; provida principium circumspectio in sui status culmine, tanto magis ab omnibus Excellitur commendanda, quanto amplius et opulentius bene sibi seruientes remunerat, et ipsos ad seruiendum animans, manu munifica reddiderit aptiores. Constare volumus igitur omnibus evidenter, quod dilecto et fideli nostro Domino Folconi Ioansson et suis hæredibus Curiam Häkkienäss, cum colonijs, agris, pratis, pascuis, siluis, molendinis, piscarijs et ceteris pertinentijs, intra sepes et extra, longe uel prope positis, mobilibus vel immobilibus, cum beneuolentia et voluntate nobilium virorum, Domini Ioon dicti Ängill, et Petri Magnussons, ipsi Domino Folconi in præsentia nostra coram multis fide dignis publice et fauorabiliter adhibita, damus et tradimus iure perpetuo possidendam, transferentes in ipsum suosque hæredes plenum proprietatis ius et possessionis dominium prædictam curiam, cum suis pertinentijs superius tactis occupandi, vendendi, donandi, commutandi, et quocunque modo voluerint pro suis usibus ordinandi, et ab ipsis nunquam alicuius aduentionis ingenio revocandam. In cuius rei Evidentiam, sigilla nostra, vna cum sigillis Venerabilium Patrum, Dominorum, Laurencij Lincopensis, Magni Wexionensis Episcoporum, ac cum sigillis nobilium Dominorum, Domini Aberni Sextensson Dapiferi nostri, Domini Philippi Vlffson, Domini Ioon dicti Ängill, et Petri Magnussons suprascripti, præsentibus sunt appensa. Datum Sääm Anno Domini M. CCC.VII. Dominica infra octauas Epiphaniæ.