SDHK-nr: 15735

Wetet, dat wy juwen bref wol vornomen hebben, den gy unsem sone nu. sanden, dar wy jw vruntliken vor danken, dat gy by dem meistere arbeidet hebben unde vortan arbeiden willen; unde wy bidden jw gerne dar umme, dat gy dar to helpen willet, dat unsem sone unde uns mochte een gud ende werden umme de saken, dar he unde wy dem meistere unde jw vake eer unde ok nw lest [van] togescreven hebben. Vortmer nadem dat unse sone al tiid na des meisters vruntschop unde willen gestan heft, unde noch gerne steit, wo em mochte dat syne volgen, so vormode wy uns des wol, dat he der bodeschop wol beide unde warnemen late to Philippi unde Jacobi nu negest to komende, alse de meister unde gy ene dar umme beden in synem unde juwem breve, unde alse vor screven steit. Wor umme bidde wy jw, aat gy dar to helpen raden, dat dat denne up eenen saligen guden ende komen moge sunder lenge thogeringe unde latet unsem sone unde uns dat duste vurder jegen dem meistere unde dem orden unde jw vorschulden etc. Scriptum in castro Helsingborgh 1401 octava beati Martini etc., nostro sub secreto.