SDHK-nr: 16264

Margareta Dei gracia Waldemari Danorum regis filia. Post salutacionem. Gy weten wol, dat wy nu in dem wintere unse boden mit unsen breven over to jwem homeistere unde to jw sanden, dar wy em unde jw inne toscreven, alse wy vruntlikest konden; dar helde gy unse boden also lange, alse jw gut duchte, also dat he nu wedder qwam sunder antwerde; dar umme wete wy nicht, wo wy dat vornemen sullen, men wy hopen yo, dat de meninge gut sy. Unde een del unser boden holt juwe homeister unde gy noch gevangen in Prusen: dar umme dut wol unde sendet uns de los wedder. Vortmer wo unse son unde wy juwem homeistere by dessen jegenwardigen kumpthur, broder Johan von Voltzen, unde by unse egenen boden, de wy nu uppe juwes meysters unde juwen loven to jw senden, nu. togescreven hebben, denke wy wol, id wert jw wol to wetende; dar umme bidde wy jw, dat gy unses sones, unse unde desser rike beste don unde ramen beyde in dessen saken unde in allen anderen, also dat wy dat vinden, so vorschuldet he unde wy dat gerne duste vurder mit jw. Desser vorscreven stucke beghere wy een antwerd by dessen boden; unde helpet dar to, dat se varlosen wedder mogen komen to unsem sone unde to uns. Unde wille wy [C: gy] icht sunderlikes, dat wy umme juwer leve willen don mogen, dat scrivet uns ok to. Dar mede bevele wy jw Gode. Scriptum in castro nostro Nykopinge die tercia pasce.