SDHK-nr: 16362

Margareta, Dei gracia Waldemari Danorum regis filia.Vruntlike grot touoren ghesant. Wi dancken ju leuen, sunderghen vrundes vor vele gudes vnde doen ju witlick dat vns dre juer breue wurden nw an dunredaghe vnde er queme wi nicht to vnse sone, wente wi weren vpgheuaren to deme Holme in deme sulfuen werfue, dar ghy vns in dem enen breue nw van screuen van des gudes weghene, alse de van Reuele screuen dat en vnde mer kopluden to horde, vnde hebben vns dar also ane beuiset, alse den van dem Holme wol witlik ys dat wy hopen dar nene sculd ane; vortmer vmme den knecht, de de by Peter Hughen was, alse gy in deme andern breue screuen, dar wille wi gerne vmme vraghe vnde willen vns dar ane bewisen alse wy best moghen; vortmer vmme de vangenne van Prutzen alse ghy screuen in deme dridden breue, wetet dat vnse sone vnde wy hebben se nw wedder to dem homeyster ghesant, vrij vnde los erer ghefencknisse, alse den ridder de borghemeistere, vnde de mit en ghevangen wurden de to vnse hant quemen vnde hopen to gode he wille vnse sone, vns vnde desse rike jo deste vurdere helpen vnde sterken in allen stucken vnde vnse here Got vnde gy konnet dat wol dyrkennen dat wi dat vmme des besten willen ghedaen hebben; vortmer so bidde wy ju vruntliken dat gy dar to helpen vnd ju dar truweliken ane beuisen willen, dat yt moghe bedaghet werden twischen der hertichinnen van Sleswigh, eren kinderen den Holtzeden vnde den Dytmerschen, bet also lange dat ghy vnde wy vnde mer vrunde dar by komen moghen, doch alse dat mallich in syner were beholde dat he hir to ghehat heft vnde dat mallich sines rechtes vnuorsumet sy an beyden siden wente wi ju hir ane node anders bidden wolden men dat vns duchte dat liik vmme liik were an beyden ziden, doet hir by vnde by allen andern zaken alse wi wol to ju louen, dat ghy gerne doen vnde screuit vns to by dessen boden wo lange it wert bedaghet vnde eyn antwerd van dessen vorscreuenen stucken wente wi der hertichynnen vnde den van Hamborch vnde den Holtzsten oc by dessen sulfuen maten to screuen hebben. Vortmer alse ghy vns lest screuen alse her Jordan van vns schedede dat ghy dar vmme j.ue boden in Prutzen hadden vnd were noch nicht wedder komen, dar vmme scriuet vns wedder by dessen boden wat antwerde ghy dar van ghekreghen hebben, vnde wo ghy vnde mer der anderer stede it dar vmme hebben willen. Vortmer wetet dat vnse sone varet nw to Norghweghen vnde wi to Denmarcken, dar vmme wille ghy icht sunderghes dat wi vmme j.uer leue willen doen moghen, dat screuit vns dar hen to; dar mede beuele wi ju Gode. Scriptum in villa nostra Jønæcøpung, anno Domini mcdquarto, die beati Martini episcopi et confessoris, nostro sub secreto. Adress: Prouidis et circumspectis viris dominis proconsulibus et consulibus ciuitatis Lubicensis, amicis nostris sinceris detur hec.