SDHK-nr: 288

Testamentum Quod pius Pater noster Absolon Archiepiscopus ante obitum suum confecit. Quæ præsenti pagina continentur, ex testamento legavit & donavit. Venerabilis Dominus Absolon Lundensis Ecclesiæ Archiepiscopus, Sueciæ Primas, ad hoc vocatis & præsentibus Domino Esberno, Fratre suo, & Domino Gaufrido Abbate de Sora, & Tochone & Achone Præpositis & Magistro Johanne & Thordone Capellano suo, Lundensis Ecclesiæ Canonicis, & Anfrido Presbittero, & Haquino Camerario suo, & Paulo & Simone pueris suis, & Henrico Converso de Sora, totum videlicet patrimonium suum, excepto Fialensleve, quod Fratri suo contulit, Monasterio de Sora donavit. Monasterio de Aas in Hallandia Vathby, cum omnibus attinentiis suis, excepto molendino donavit & scotavit. Ad mensam Canonicorum Lundensis Ecclesiæ Esbiruth cum molendino in Rogen, & cæteris suis attinentiis sylvis omnibus & terris donavit & scotavit. Similiter Saxulstorp in Ruma cum Ecclesia & cæteris suis attinentiis eisdem Fratribus ad mensam donavit & scotavit. Ad candelas cereas utriusque Coronæ & ad cereum nocturnum in monasterio Beati Laurentii quatuor marcas argenti singulis annis de censu Civitatis, qui vulgariter dicitur Midsommers Gylde, dedit. Venerabili Domino Erico Nidrosiensi Archipræsuli, propter Justitiam exsulanti, centum marcas argenti. Martino Bergensi Episcopo, quinquaginta marcas argenti. Nigello Episcopo Staffengrensi, quinquaginta marcas argenti. Ivaro Hamarcopensi Episcopo, quinquaginta marcas argenti. Nicolao Aslonensi Episcopo, ciffum argenteum & scutellas argenteas, quas idem Episcopus ei quondam dederat, donavit. Domino Regi ciffum argenteum mirabiliter fabrefactum, quem Dominus Nidrosiensis ei quondam dederat, & vasculum aureum cum musco dedit. Dominus Suno ei tenebatur reddere CXXX. marcas argenti, & illud debitum Domino Petro Roschildensi Episcopo & Fratribus suis reliquit. Episcopo Roschildensi quinquaginta marcas argenti duabus minus concesserat ad emendum Alstofta, quas idem Episcopo remisit, & ciffum argenteum, quem ei quondam dederat, donavit. Fratri ejus Domino Cancellario, ciffum argenteum, quem ei Dominus Suno quondam dederat, legavit. Domino Esberno ciffum argenteum, quem Hildebrand fecerat, & parvum ciffum, de quo Pater ejus potiones accipere solebat, & cuilibet filiorum suorum ciffos argenteos de majoribus ciffis dedit. Domino Alexandro ciffum argenteum de melioribus & loricas quas habebat & duobus filiis suis, duos ciffos argenteos modicos dedit. Dominæ Margaretæ duos ciffos Rojanorum Idolorum. Canonicis de Paraclito ciffum argenteum de plano opere, ponderantem circiter decem marcas argenti. Majorem ciffum argenteum quem Sora habuit, Capellæ de Sora dedit, ad calicem faciendum. De scutellis suis argenteis jussit calices fieri in monasterio B. Laurentii fortes & sufficientes: quod vero his prædictis de ciffis argenteis & scutellis super fuerit ad perficiendas Coronas in templo reservari præcepit. Dominus Alexander habuit octo marchas auri & dimidiam ad opus casulæ & coronarum, ex quo auro magnam partem Casulæ jam apponi feci. Eschillus presbyter annulos aureos habet ad opus eorundem reservandos; argentum quod Liuthgerus ei tenebatur persolvere, totum pauperibus jussit erogari. Dominus Archidiaconus de argento, quod accepit pro decimis & a presbyteris & de argento, quod habet Dominus Alexander, Domino Archiepiscopo Nidrosiensi, & Episcopis prædictum argentum persolvat, & quod residuum fuit, inter monasteria Scaniæ & Selandiæ fideliter distribui præcepit. Dominus Alexander autem argentum suum non habet, nisi quantum conflari poterit ex septingentis marcis denariorum Scaniensium veteris monetæ, & ex eodem argento præcepit Domino Alexandro, ut XVI. marcas Soræ mitteret quibusdam persolvendas. Argentum quod Hericus filius Harinæ, & Sueno frater ejus, & Conradus de Tumethorp ei tenetur persolvere, cujus debiti summam Archidiaconus novit, præcepit reservari. Debitum, quo Bondo filius Gamalielis ei pro donatione exactionum tenebatur, heredibus ipsius Bondonis totum pro anima sua remisit. Herico Batti cappam forratam de pellibus marturum dedit. Magistro Petro Capellano Archiepiscopi Nidrosiensis cappam forratam de pellibus griseis dedit. Decano Lundensi pallium marturum dedit. Thordoni Cappellano suo superpellicium cum pellicio de marturibus, & cappam vario forratam & juppam vario forratam dedit. Simoni minorem juppam de griseo forratam: Petro Stamma griseum pallium quotidianum. Marsilio coco, coopertorium vulpinum dedit. Petro Stabulario equum, quem filius Biorn ei donavit, dedit. Fratri ejus Wlff loricam, quam Esbernus Mule ei dedit, donavit. Haquino Camerario suo equum dederat, quem Bondo ei dedit. Equum brunei coloris Haquino Normanno dedit. Nigrum equum, quem Soræ habuit, eidem monasterio reliquit. Equum blaccatum Domino Archiepiscopo Nidrosiensi dari præcepit. Eschillum Bathsven libertate donavit. Mulieres, quas Nicolaus Stabbellarius de libertate in servitutem suscepit, ubicunque reperiantur, cum filiis suis libertate donentur. Mulierem acceptam de Biargaherred in Scania cum filiis suis libertati donavit. Saxoni Clerico suo duas marcas argenti & dimidiam concessit, quos sibi donavit. Saxo debet duos libros, quos Archiepiscopus ei concesserat, ad monasterium de Sora referre. Magistro Johanni biccarium argenti dedit. M. Walthero pallium griseum, quo in nativitate Domini vestiebatur, dedit. Annulos aureos quindecim cum lapidibus, & sedecimum sine, lapide monasterio B. Laurentii dedit ad plenarium faciendum. Præposito Achoni minorem ciffum argenteum, quem Sora habuit, dedit. Argentum quod apud Cluniacum habuit, dimidium eidem monasterio contulit, medietatem vero ad Claram Vallem transmitti præcepit. Ecclesiæ de Wellinge tenebatur argentum reddere, cujus summam Archidiaconus novit* Ecclesiæ de Stangby tenebatur mansum unum reddere, quem dedit pro manso in Köpingh, & jussit ut Ecclesia in Stangby habeat mansum in Köpingh, donec de Episcopatu reddatur. Præbendæ cuidam tenebatur dimidium mansum in Huphackre, & jussit ut in Arleff haberet dimidium mansum, donec de Episcopatu reddatur. Præbendæ Nicolai Monialis dimidium mansum in Asmundathorp, & jussit ut in Nybyle haberet in parochia de Saxulstorp, donec solvetur de Episcopatu. Magister Hugo proprium præbendæ suæ habeat, donec de Episcopatu persolvatur. Archidiacono dedit pallium magnum de Lækatt, si sit ibi, & si ibi non sit, lectisternium forratum de marturibus ei donavit. Jofrido Coco, duas cappas pluviales, alteram forratam. Præcipue Archidiacono præcepit, ut campanam quam facere proposuerat, consummaret. Magistro Hugoni lectisternium vario forratum. Nicolao filio Archidiaconi superpelliceum vario forratum. Eschillo Presbytero cappam forratam, quæ est in castro de Haffn. Christianum Cocum, qui injuste captus erat in servitutem, libertate donavit. Achoni magistro laterum, & Achoni Lapicidæ præcepit ut Archidiaconus benefaceret. Pixidem argenteam cum reliquiis monasterio de Sora dedit. Retribuat ei Dominus mercedem in vita æterna Amen.