SDHK-nr: 2057

Omnibus Presentes Litteras Jnspecturis, Nicolaus Diuina Miseracione Archiepiscopus, Totumque Capitulum Ecclesie vpsalensis salutem in domino sempiternam. Noueritis, Quod nos Reuerendo viro, Domino Olauo Canonico Ecclesie nostre, quem pro quibusdam nostris et Ecclesie nostre negocijs apud sedem apostolicam promouendis, ad sedem destinauimus eandem, ac ipsum propter hoc, nostrum et Ecclesie nostre procuratorem constitueramus, Damus et concedimus, nostro et Ecclesie nostre ac nostri Capituli nomine tenore presencium, plenam et liberam potestatem ac mandatum speciale, Contrahendi et Recipiendi mutuum, vsque ad ducentas marchas argenti puri et examinati, a quibuscumque creditoribus pro nostris negocijs in Romana Curia prosequendis, Dantes Eidem nostro et ecclesie nostre ac Capituli nostri procuratorj, plenam et liberam potestatem ac speciale mandatum obligandi propter hoc, Nos, (successores nostros *), et Ecclesiam nostram, et omnia bona nostra, (Successorum nostrorum *) et Ecclesie nostre mobilia et immobilia Ecclesiastica presencia et futura, et promittendi, Quod nos, dictam pecuniam restituemus et restituj faciemus, loco, termino, et tempore statuendis cum omnibus dampnis expensis et interesse, Que uel quas, dicti creditores incurrerent, si in statutis loco termino et tempore predicta pecunia eis non fuerit persoluta, Necnon renunciandi in hoc, nostro nostrorum Successorum dictorum et ecclesie nostre, omni Juris auxilio Canonici et Ciuilis, Priuilegio fori, Beneficio restitucionis in integrum, Condicioni indebiti et sine causa, appellacionis remedio cuiuslibet tempore feriato, Juri reuocandi domum, Legi de quadrimestri tempore, Legi dicenti, generalem renunciacionem non valere Priuilegio cruce signatis et cruce signandis, concesso vel iterum concedendo, Excepcioni eciam Quod dicta pecunia, non sit in nostram, nostrorum Successorum et ecclesie nostre utilitatem conuersa, Constitucioni de duabus dietis edite in concilio generali, Conuencioni locorum et Judicium omnibus litteris et indulgencijs apostolicis impetratis et impetrandis ac alijs quibuscunque, et omnibus alijs excepcionibus, per quas, Nos et successores nostri et ecclesia nostra, possemus contra creditores eosdem in posterum quomodolibet nos tueri, Submittendi quoque Nos Jurisdiccioni auditoris causarum camere domini pape, Suscipiendi et acceptandi sponte, omnes condempnaciones et excommunicacionis sentencias, quas per dictum auditorem contra nos fieri vel in Nos contingit promulgari, Jurandi in animas nostras, de obseruandis omnibus et singulis supradictis, et omnia alia et singula faciendi in predicto negocio, que veri et legittimi procuratores facere possunt et debent, et que Nos ipsi faceremus seu facere possemus si Presentes essemus. Jnsuper damus eidem procuratori nostro potestatem per presentes et speciale mandatum, Predictam summam pecunie per ipsum mutuo receptam, erogandi et expendendi, pro dictis nostris negocijs et causis, prout sibi visum fuerit expedire. volentes, super erogatis et expensis per eundem, absque quauis alia prohibicione, stare simplici assercioni dicti sui, Ratum et gratum habituri, et inuiolabiliter obseruaturi, quicquid per dictum procuratorem et nuncium nostrum, factum fuerit in omnibus premissis et singulis Premissorum Jn cuius rei testimonium, Presentem litteram fieri, et sigillorum nostrorum munimine, fecimus roborari. Actum vpsalie. Anno Domini, Millesimo . CCC°. Quarto, XV°. kal. Maij.