SDHK-nr: 2881

Omnibus presentes litteras inspecturis Jngiburgis et Jngiburgis dej gracia ducisse sweorum relicte dominorum . E[rici] et .Waldemari] quondam ducum ibidem, salutem in domino sempiternam Cum creatura non habeat quid pro meritis respondeat creatori, sollicite tamen precauendum est, ne filios hominum ingratitudo reos constituat, quos suis graciis preuenire et prosequi nunquam cessat, Tenore igitur presencium ad noticiam venire volumus singulorum quod Nos curiam lænæ, ecclesie lyncopensi, quam minus iuste amiserat, cum omnibus suis attinenciis restituimus et ob hoc predia quedam in wisinxø et grænnum sita, que eidem ecclesie permutacionis nomine pro lænæ, assignata fuerant, ad nos sunt pleno iure deuoluta Nos tamen attendentes dampna quam plurima. que dominus episcopus lyncopensis et ecclesia sua incurrerant isto anno, racione sui fidelis seruicii nobis inpensi et in recompensacionem dampnorum ipsi et ecclesie sue illatorum bona supradicta de consilio et consensu dilectorum consiliariorum nostrorum dominorum, Mathie kætilmundæson Birgeri pætærson Boo niclasson, et thyrkilli andrisson, ecclesie lyncopensi conferimus iure perpetuo possidenda, Ad premissorum igitur euidenciam firmiorem sigilla nostra vna cum sigillis, dilectorum consiliariorum nostrorum predictorum presentibus sunt appensa Datum stokholmis, Anno domini, M°. CCC°. XVIIIº Jn festo sancti petri apostoli quod dicitur aduincula.