SDHK-nr: 5611

Omnibus presens scriptum cernentibus Karolus Neskunnugxsson et Anundus Sturæ milites, exequtores testamenti nobilis militis domini Anundi Fiinwidhæson ac Gunnildis Hemmingxdottir, relicte eiusdem, salutem in Domino sempiternam. Nouerint vniuersi nos vice et nomine eiusdem domini Anundi bona sua Baræstadhæ, parochie Roosløso, Lyncopensis diocesis, pro solucione testamenti sui ad vendendum deputata, magnifico principi ac domino nostro karissimo domino Magno, Dei gracia Suechie Norwegie et Skanie regi illustri, pro quingentis marchis denariorum Sweuorum rite et legittime secundum leges Osgotorum vendidisse, transferentes in ipsum omne proprietatis jus et possessionis dominium, ipsi domino Anundo vel eius heredibus in dictis bonis quomodocumque competens, predicta bona, videlicet quatuor attungos terre cum dimidio, domibus et pertinenciis quibuscumque, prope vel remote positis, nullis penitus exceptis, quocumque nomine censeantur, alienandi, vendendi et pro libitu sue voluntatis, quomodocumque voluerit, commutandi, ablata heredibus supradictis omni jure et facultate qualibet predicta bona vel ipsorum partem aliquam quocumque adinuencionis ingenio qualitercumque per se vel alios inpetendi. In cuius testimonium sigilla nostra vna cum sigillis nobilium virorum domini Stenonis Thuræson et Aruidi Kætillson, qui vna nobiscum predicte vendicioni consenserunt, presentibus sunt appensa. Datum Stokholmis anno Domini millesimo ccc°xl° octauo sexta feria proxima ante Erici regis et martyris.