SDHK-nr: 825

Urbanus &c. Carissimo in Christo filio E. Regi Dacie, ac Carissime in Christo filie. . . Regine Matri ejus illustribus Salutem &c.Pro sincere devotionis ac fidei pure meritis; quibus, per divinam gratiam splendere probamini vos libenter speciali favore prosequimur in hiis precipue, per que status vestri tranquillitas debeat provenire, firma credulitate tenentes, quod quanto ab apostolica Sede gratiam perceperitis ampliorem, tanto ferventius studebitis sibi super hiis, que ipsius decus aspiciunt, oportuno tempore complacere. Cum itaque sicut ex parte vestra fuit propositum coram nobis Venerabiles fratres nostri . . . Lundensis Archiepiscopus, et ... Episcopus Roskildensis se vestris publicis inimicis in suis dampnatis studiis conjungentes, se vobis publicos emulos et inimicos constituerint manifestos, ac exiverint occasione hujusmodi Regnum vestrum, nos devotionis vestre precibus inclinati, vobis auctoritate presentium indulgemus, ut nullus ipsorum hujusmodi inimicitiis propter culpam eorum durantibus inter vos et ipsos, possit in personas excommunicationis, aut terras vestras interdicti sententias auctoritate propria promulgare. Nulli ergo nostre concessionis &c. Datum apud Urbemveterem IIII. Nonas Januarii, Pontificatus nostri Anno Tertio.