SDHK-nr: 513

Gregorius Episcopus Servus Servorum Dei Venerabili Fratri . Archiepiscopo Lundensi Salutem &c.Venerabilis Frater noster .... Roskildensis Episcopus executor testamenti quondam Exberni Militis sua nobis petitio monstravit, quod cum idem E. in extremis agens certas res de bonis suis certis personis conferri et alia bona sua per ejus manus pauperibus, et piis locis mandaverit erogari, prout per litteras ipsius sigillo signatas, et plurium bonorum virorum testimonium potest manifeste probari. Margarita mulier Roskildensis Diocecis Mater et heres ipsius E. juxta quandam pravam illius terre consuetudinem, que abusus potius dici potest, videlicet, quod si probatur per duodecim testes, qui nominati dicuntur, quod decedens aliquid in testamento alicui non dimisit, testamentum decedentis non valet licet contrarium per autenticas litteras et idoneos testes probetur, negativam hujusmodi se asserens probaturam occasione talis abusus, malitiose impedire presumit, quo minus dictus Episcopus testamentum ipsum possit executioni mandare; quare pia predicti militis dispositio impeditur. Quocirca mandamus, quatenus si est ita dictam M. ut prefata consuetudine non obstante permittat idem Testamentum, quo ad ea, que in pios sunt usus legata sine difficultate aliqua executioni mandari, monitione premissa per censuram ecclesiasticam &c. compellas. Datum Viterbii III Idus Augusti Anno Undecimo.