SDHK-nr: 663

Nos Margareta, Flandrie et Hanovie comitissa, et nos Gvido filius eius, comes Flandrie et Hanovie, notificamus omnibus et singulis presentibus et futuris presentem paginam inspecturis, quod ad instanciam universorum mercatorum romani imperii Godlandiam frequentantes ad honorabilium missorum Hermanni filii Ocgeri de Lubeke et Iordani de Hamborch requisitionem de nostra bona voluntate volumus et concedimus, quod nullus mercatorum in comitatu Flandrensi duello provocetur, nec aliquis eorum propter forefacta bona alterius sed malefactorum pro suo delicto secundum scabinagium et legem terre satisfaciat et puniatur. Nullus etiam mercatorum imperii pro alterius debito coram Scabinis in Flandria contracto vel recognito detineatur nisi principalis debitor vel fideiussor existet, et si continget principalem debitorem et fideiussorem vel fideiussores ipsius ante solutionem totius debiti recedere et non reverti, et per fideiussores non satisfacere, ita quod oportet creditores eos sequi ad civitates vel oppida, ubi habent domicilia, Scabini vel iurati loci illius facient satisfieri creditori a principali debitore, vel fideiussore, vel ab eorum heredibus, sicut habent in bonis secundum iudicium et dictamen Scabinorum Flandrie, coram quibus dictum debitum recognitum fuerat vel contractum, si autem non essent ibi bona, quod sufficiat, fiat iudicium secundum legem et consuetudinem dictorum locorum . . . . . *). Nullus eciam mercator debet in littoribus Flandriae bona sua propter naufragium amittere, quod de fluctibus poterit eripere, sed pacifice fruatur eisdem. Preterea mercatores vel eorum naves, cum fuerint onerate, si prius non fuerint calumpniate legitime de aliqua re, violenter non detineantur, vel arrestentur nisi recens factum evenit, vel aliqua causa subsit, propter quam teneri possent, secundum terre consuetudinem. Si vero propter debitum fuerit mercator calumpniatus, per scabinos purgare se poterit iuramento suo, et si se purgare noluerit, solvet et emendet secundum legem loci. Ut autem omnia premissa in perpetuum robur obtineant firmitatis presentes litteras sigillorum nostrorum appensione fecimus roborari. Datum anno domini millesimo ducentesimo quinquagesimo secundo dominica Palmarum.