SDHK-nr: 3440

Jn nomine patris et filj et spiritus sancti amen. Cum cunctis mortalibus, uite terminus sit incertus, quem, secundum beatum Augustinum, Conditor noster idcirco latere nos voluit, vt finem nostrum, et nostri finis locum et tempus ignorantes, dum mors semper ignoratur, semper proxima esse credatur, et tanto feruencior vnusquisque sit in operacione, quanto est incercior de vocacione, Hac consideracione ductus, Ego Byrgerus Petersson. vplandiarum legifer huius mortis terminum, cunctis mortalibus formidandum, cupiens de bonis mihi ab altissimo concessis, pietatis operibus preuenire, meum in hunc modum, sanus mente et corpore, condo et ordino testamentum, Jn primis apud ecclesiam Cathedralem vpsalie, intra Cappellam beati Nicolai ibidem iuxta dilectam vxorem meam Jngiborghim, mei corporis eligo sepulturam, ad cuius ecclesie fabricam lego, quatraginta marchas denariorum. Ad Cappelle uero predicte ornatum, viginti marchas denar. Jtem pro institucione vnius prebende in dicta vpsalensi ecclesia lego et assigno, quatuordecim oras terre cum dimidia in Malmø, et swinalundum. sudermannie, et vnam marcam terre. sigwalstadum in Norunde. perpetuo possidendas, hac condicione apposita, quod sacerdos qui inibi prebendatus fuerit singulis septimanis tres missas dicere, scilicet vnam de sancta trinitate. aliam de beata virgine, et terciam pro defunctis perpetuo sit asstrictus, Jtem Ecclesie Lincopensi. decem marchas denar. Jtem cuilibet ecclesie Cathedrali in regno swecie exceptis predictis. tres marchas denar. Jtem fratribus predicatoribus sigtonie, triginta marchas denar. Jtem fratribus predicatoribus skieningie, quinquaginta marchas denar. Jtem cuilibet claustro fratrum predicatorum in regno swecie premissis exceptis. tres marchas denar. Jtem fratribus minoribus stokholmis. quatuor marchas denar. Jtem cuilibet claustro eiusdem ordinis in regno swecie, preter iam dictum. duas marchas denar. Jtem sororibus apud sanctum martinum skieningie. quatuor marchas denar. Jtem sororibus apud sanctam Claram stokholmis. tres marchas denar. Jtem monasterio in skoo. viginti marchas denar. Jtem cuilibet monasterio monialium eiusdem ordinis in regno, skoo excepto, tres marchas denar. Jtem cuilibet monasterio monachorum eiusdem ordinis. in regno, tres marchas denar. Jtem fratribus sancti Johannis in Eskilstunum, Curiam meam yaat, parochie østeryaat, in Werendia, cum omnibus eius adiacencijs, perpetuo possidendam, hac apposita condicione, quod ipsi pro anima mea anniuersarium annis singulis sollenniter facere teneantur. Jtem domui sancti spiritus vpsalie, viginti marchas denariorum pro quibus uolo ut ematur predium, secundum industriam et solerciam discretorum uirorum, Jomini Jorda ni de Birium, et Johannis Jngimarsson. ad usum perpetuum dicte domus. Jtem domui dei stokholmis, quatuor marchas denar., Jtem cuilibet hospitali in regno swecie. duas marchas denar. Jtem cuilibet Ecclesie in cuius, parochia, Curiam uel Curias possideo, vnam marcam, ecclesie, et alteram sacerdoti, que debent de eisdem curijs exsolui, singulis ecclesijs prout sunt parochijs situate. Jtem deputo quatraginta marchas denar., pro missis dicendis, et ad distribuendum pro anima mea inter pauperes et egenos, Jtem quatraginta marchas denar. distribuendas inter familiam meam cottidianam, prout executoribus huius mei testamenti uidebitur expedire, Pro solucione autem premissorum omnium, obligo curias meas, Edh. et vnøø in Nericia situatas, ita videlicet, quod si predicta omnia per me legata infra diem et annum, a tempore obitus mei, per heredes meos persoluta non fuerint, extunc dominus . . Archiepiscopus vpsalensis et Capitulum suum, vi presencium potestatem habeant, dictas Curias meas Edh, et vnøø, redimendi uel distrahendi, seu quomodolibet pro suo placito ordinandi, pro predictis omnibus persoluendis:. Jnsuper pro soluendis meis debitis que post mortem meam inuenta fuerint non soluta, et ad satisfaciendum per me lesis in rebus nel personis, si Exequtoribus meis hoc veraciter constiterit, omnia bona mea in Norunde sita. videlicet mobilia et inmobilia cum molendinis, excepta vna marcha terre in sigwalstadum superius expressa, obligo domino . . Archiepiscopo vpsalensi et Capitulo suo, predictis, sub hoc pacto, quod si per heredes meos tam creditoribus meis quam eciam per me lesis, si inuenti fuerint, infra diem et annum, a tempore obitus mei satisfactum non fuerit, Predicti dominus . . Archiepiscopus et Capitulum dicta bona in Norunde, distrahendi, ad satisfaciendum premissis liberam habeant potestatem. Ceterum, quia filium habeo minorem annis, prouisores, ac tutores eidem constituo, venerabilem patrem dominum . . Archiepiscopum vpsalensem, et Nobilem uirum dominum Kanutum Jonsson, dapiferum regni swecie, ac discretos uiros, Johannem ingimarsson, et Germundum hakunsson, et quemlibet eorum ih solidum, et substitutum. Jtem omnia testamenta prius per me facta, per presentes reuoco et annulo. Executores vero huius mei testamenti. et mee vltime uoluntatis, constituo et ordino, venerabilem patrem dominum . . Archiepiscopum sepedictum, ac Nobiles uiros, dominos, Kanutum Jonsson, dapiferum predictum, Magnum bendictsson, Anundum rørixsson, Necnon discretos uiros, Johannem Jngimarson Germundum haqunsson, et . . Priorem sictoniensem, Rogans, vt si omnes simul adesse non poterunt, ille uel illi qui. poterint uel voluerint, meam exequantur in premissis omnibus uoluntatem. prout saluti anime viderint expedire, et ego de ipsis gero fiduciam specialem, Testes autem istius mee ordinacionis et ultime uoluntatis, ad hoc specialiter uocati sunt isti, Frater Petrus philippi Prior sictoniensis, et frater Ericus, ordinis predicatorum. Domini Laurencius de Ringboheredh, Clemens Jonsson, de husaby lyhundere, Jacobus vicarius eiusdem ecclesie, Suno, Rodgerus Plump. Necnon et prudentes uiri, Johannes ingimarsson, Germundus haqunsson, Olauus de Løghambre, Andreas ionsson, Erlendus de bødhunge, et plures alij fidedigni, Jn premissorum igitur robur et euidenciam firmiorem, sigillum meum una cum sigillis, venerabilis patris domini Olaui Archiepiscopi vpsalensis, domini Kanuti Jonsson, illustris regis sweorum dapiferi, ac dominorum, magni bendictsson, Annundi Rorixsson. Johannis ingimarsson, Germundi haqunsson, ac Prioris Sictoniensis, presentibus est appensum. Datum et actum apud Curiam meam Finstad. Anno domini M°. CCC. vicesimosexto. die vndecim Milia virginum.