SDHK-nr: 3773

Omnibus presens scriptum cernentibus Ericus bobergh salutem in domino sempiternam. Cum ex Fragilitate condicionis humane. hominum memoria sit labilis et vita breuis. expedit vt rite acta litterarum serie et fidelium testimonio perhennentur. Quare tenore presencium constare omnibus dignum duxi me pura et spontanea voluntate mea dilectissime consorti mee birgitte knutssdotor racione donacionis propter nupcias iuxta consuetudinem laudabilem. et a nostris predecessoribus approbatam secunda die nupciarum vt moris est. bona mea in rydhø et asmunstadhum et omnia bona in thyusth. cum omnibus suis attinenciis. pratis siluis. pascuis siluis(!). molendinis et ceteris eisdem adiacentibus sub infrascriptis condicionibus rite et legittime contulisse. videlicet vt si domino disponente dicte vxori mee et michi liberi procreentur. dicti liberi iure materno non paterno succedant vniuersaliter in eisdem. Si vero me contingat dicta vxore mea superstite sine liberis decedere ad eam et heredes suos. dicta bona sine omni excepcione transeant vniuersa. Si vero ipsam sine liberis me viuente mori contingat ad me et heredes meos predicta bona libere redeant. condicione qualibet procul mota. Promittoque me dictam donacionem absque fraude firmiter seruaturum. Jn cuius rei testimonium sigillum meum vna cum sigillis discretorum virorum. Domini Haraldi prepositi lyncopensis. Kanuti brynnyolfsson. wlphonis philipusson. algoti brynnyolfsson. vluidi birgersson. Johannis huuudh. Petri birgersson. Jacobi niclæsson. et birgeri ciuis skenningensis qui confirmacionis predictorum bonorum exstitit proloqutor presentibus est appensum. Datum rønhø anno domini M°. CCC°. XXXI. Die beate agnetis virginis.