SDHK-nr: 15837

Tres reuerentz peres en Dieu et noz tres chers et foiaulx. Nous vous salüons joüement et sauoir vous faisons que, puis notre departir de vous, nous aüions inspeccion des lettres du roy de Denmark ja tarde a nous apportees par lonnourable pere en Dieu, leuesque de Bangore et notre ame escüier Johan Paraunt, noz messages, ore a leur retour par deüers nous et ycelles lettres bien entendües et par especial vn article touchant le desir, que nous et les grandz et le peüple de notre royaume aüions, que le mariage se prendroit dentre le dit roy et notre tres chere et tres amee fille Phelippe, qüel article mesme le roy fait reherser en ses dites lettres, certes il nous semble de notre aduis, que la response que nous ferions au dit roi, selon ce que vous et nous en aüions communication, ne poürra honestement passer, ne resonnablement sanz lüy donner bonne cause de refuser tout outrement cel mariage, et pensons bon que si vous eussiez bon veüe les secretes lettres, vous eussiez este mouuez de lüy aüvoir fait donner autre response, plus conüenable et acceptable a lüy que ceste encore appointie sanz enfreindre la besoingne et sanz venir au contraire de ce que promis lüy auons expressement par nos autres lettres passees de laduis et deliberation de notre conseil, si aüons par tant fait faire vne copie dune lettre, quelle il nous semble estre raisonnable et correspondente a les siennes, la quelle copie nous vous envoions par lonnourable pere en Dieu, leuesque de Bath, auec les dites lettres du dit roy et pour les voir. Vous preons tres chierement que sür ce donner vous emettiez vn sage adüis a la preseruacion de lestat de nous et de tout notre royaume, et ce ne veuillez lesser, comme nous nous fions de vous. Donne soubz notre signet a notre chastel de Wyndesore, le xxviij(me) jour dauvril.