SDHK-nr: 3043

Omnibus presentes litteras inspecturis. Frater. Jsrael. dei gracia Episcopus Arosiensis. salutem in domino sempiternam. Cum ad Arosiensis Ecclesie regimen. diuina fuissemus licet immeriti dispensacione vocati. inter cetera. que correctionis et emendacionis limam. ibidem exposcere videbantur, vnum inuenimus jn quo periculum animarum non modicum uertebatur/videlicet. quod cura parochie in Ecclesia kathedrali. que quidem parochia prebende quam nunc dominus phillippus arosiensis canonicus possidet. reputabatur annexa. sed ipsius obuenciones et redditus inter canonicos. kathedralis ecclesie diuidebantur equaliter. jta tamen quod qui reputabatur curatus. parochie duplam porcionem perciperet racione sui laboris. adeo vacillabat quod nunc per ipsum canonicum nunc per ipsius vicarium. constitutum in choro. jnterdum eciam per diuersos ceterorum canonicorum chorales vicarios. quos ad id nominari contingeret agebatur. Ex qua nimirum varietate ac incertitudine, non solum curam ipsius parochie. negleccius procurari. sed et chori officium frequencius minui Contigit ac turbari. Nos igitur super hoc cum capitulo nostro, deliberacione prehabita diligenti, de ipsius consilio et consensu. jn prefata parochia. que vt predicitur, prebende reputabatur annexa. precepto juris obtemperare volentes. vicarium perpetuum duximus deputandum. Assignantes sibi pro sua. ac onerurn incumbencium sustentacione. de ipsius parochie redditibus. congruam porcionem. videlicet. tres oras terre jn wadbybolstad. et sex. oras. in norbolstad. Jtem Tredecim solidos terre. jn rozbergh. parochie skiædierghe. Jtem de predijs sibi. a domino preposito jn perpetuum assignatis. dimidiam lestam annone singulis annis. cum tribus. marchis denariorum. Jtem jntegraliter omnes decimas predicte parochie kathedralis Ecclesie. silicet. prediales. personales et vinales. cum decima Ecclesie predicte. Jtem septimam partem. omnium. que legantur canonicis. et ipsi vicario perpetuo. a laycis parochianis. infra dictam parochiam. Jtem medietatem septime partis oblacionum. omnium. que fiunt in altaribus. Et medietatem septime partis mortuariorum. de ipsa parochia proueniencium. uel aliunde. qui apud ipsam Ecclesiam tumulantur. Jtem pensiones de sex fundis. et domibus in ipsis edificatis. in antiquo cimiterio. Alijs eiusdem parochie prouentibus,, canonico qui nunc est. uel pro tempore fuerit, reseruatis. ac in perpetuum assignatis. Saluis nichilominus per omnia. canonicorum porcionibus conswetis. vt ipsas deinceps. jn ea porcione participent. qua solitum fuerat temporibus retroactis. Jn cuius ordinacionis Testimonium. nostrum et capituli nostri sigilla presentibus sunt appensa. Nos quoque Haquinus prepositus. Thidemannus. Arnulphus. Phillippus. et Hemmingus canonici arosienses. jn euidenciam et certitudinem pleniorem consensus nostri in dicto negocio adhibiti. sigilla nostra personalia presentibus duximus apponenda. Datum et actum apud manerium nostrum Feholm. Anno domini. Millesimo. Trecentesimo. vicesimo. pridie Nonas decembris.