SDHK-nr: 1641

Jn nomine domini amen. Anno incarnacionis eiusdem. Millesimo CC nonagesimo quinto. Ego Haquinus canonicus lincopensis. prepositusque de nyudhungia corpore licet debilis. tocius tamen mentis & sensus compos atque sanus meum jn hunc modum condo testamentum. Jn primis michi ob Remissionem meorum peccaminum confero ecclesie lincopensi duas curias. videlicet. stafsio & brundzrydh cum omnibus suis attinencijs prope uel remotis. Excepta illa parte mobilium quam villici possident in eisdem. Jta tamen quod dominus lincopensis aliam ad suam mensam retineat. & alteram assignet fabrice lincopensi. Pro quibus dictus dominus lincopensis in missis animarum. meam respiciat animam prout sibi deus duxerit inspirandum Jtem confero eciam ecclesie lincopensi quartam partem Octonarij quam emi in aby. jta quod ad prebendam pertineat beate katerine si persona canonice ibi instituta. in primo anno obitus mei pro anima mea quinquaginta duas missas animarum celebrari fecerit. Alioquin per dominum meum lincopensem ordinetur. Preterea confero ecclesie. decretum. decretales cum glosa ordinaria. Jtem vetus digestum cum glosa magistri Azonis & quoddam psalterium glosatum, Domino meo lincopensi confero vnum ambulatorem nigrum. Domino beroni canonico lincopensi confero XI Marchas den. quas michi tenetur pro illa quarta parte octonarij in aby. Jnsuper & vnum cornu Claustro noueuallis confero vnum octonarium wiste in villa biergheme & vnum equm & caldarium braxatiuum pro VII marchis emptum vbi michi eligo sepulturam. Preterea pro redempcione crucis assumpte solueram triginta libras sterlingorum nouorum quorum medietatem recognosco fratrem meum possedisse pro quibus supplementum deducat de curia mea fallandafors ex indiuiso Similiter quia jdem frater meus promisit me arma mea suprascripta. & eciam inferius vtpote libros dictos & dicendos libere conferre pro mee libito voluntatis. cum eosdem mecum pro parte media possedisset. volo quod ipse arma sua vnacum dextrario libere habeat a cuiuscumque inpeticione Exinde confero fratribus minoribus & maioribus ac hospitalariis singulis duas marchas* vnam ad vsum personarum & aliam ad reparacionem edificiorum per dyocesim constitutorum lincopensem. Jtem vnam marcham ecclesie in ødhistuw & vnam marcham ecclesie de malbech. et vnam marcham vicario domini ormolphi. duas marchas ecclesie de hylsio & duas marchas vicario ibidem de fructibus hactenus ibi ex parte mea percipiendis. sacerdoti de Skedhum vnum equm pro tribus marchis. Ecclesie de hyltopthum vnam marcham. Actum fallandafors anno & tempore suprascriptis heredibus requisitis & consencientibus Jn cuius rei testimonium sigillum meum presentibus est appensum Et peto sigillum dominj mei lincopensis & jnsuper sigilla dominj beronis & magistri bosonis canonicorum lincopensium. quos exequtores eligo super hijs qui sunt in øsgocia. maxime pro meis exequiis ibi faciendis secundum constitucionem domini lincopensis. & domibus religiosis ibi fiat elemosina de mea ecclesia ibidem uel prebenda.