SDHK-nr: 8605

Omnibus presens scriptum cernentibus . Petrus Niclesson de Wangh miles . salutem in Domino Nouerint vniuersi . me venerabili in Christo patri ac domino . domino Nicolao archiepiscopo Lundensi Suecie primati . omnia et singula bona mea in parrochia Ifætoffte sita . videlicet curiam principalem in Gyørtheløkke cum coloniis suis in Ifætoffte ac omnibus et singulis ipsorum bonorum adiacenciis mobilibus et immobilibus agris pratis . pascuis siluis . piscaturis . nullis exceptis . que quidem bona . cum dilecta vxore (a ) mea Cecilia post mortem patris sui Henrici Jonsson justo hereditatis titulo habui . assignasse . in manus tradidisse ac scotasse . jure perpetuo possidenda . Obligans me et heredes meos . predicta bona omnia et singula . prefato domino Nicolao archiepiscopo Lundensi Suecie primati . et eius successoribus ad apropriandum et disbrigandum ab inpeticione quorumcumque . recognoscens me ab eodem domino archiepiscopo pro premissis bonis omnibus plenum precium habuisse et leuasse . ad mee libitum voluntatis In cuius rei testimonium sigillum meum vna cum sigillis virorum discretorum . dominj Petri Stigson militis . Haquini Hillebrandi et Andre Oleffson ciuium Lundensium . presentibus est appensum Datum anno Dominj Mccclxiiij die beatarum vndecim milium virginum