SDHK-nr: 5500

[1] Supplicat Sanctitati vestre deuotus filius vester Magnus Rex Suuecie, quatinus ex speciali deuotione, quam habet ad beatissimam Mariam virginem gloriosam cotidie in sua presencia de eadem beata maria faciat missam cum nota nisi impeditus fuerit solenniter celebrari, alias sine nota dignemini concedere cuilibet vere penitenti et confesso interessenti cuilibet misse, quam sic idem Rex in sui presencia faciet imposterum celebrare. Centum dies indulgentie uel alias secundum quod vestre placuerit sanctitati. - Fiat de quadraginta diebus R.[2] Jtem Supplicat quod cum ex industria dicti Regis terre infrascripte scilicet Scania Blecongia Listria Halandia Jnsula Hwadhen coniuncta seu contigua Regno Suecie, tam ex titulo emptionis quam alias ex iusto titulo acquisita fuit (!) a Rege Dacie olim domino earundem terrarum pro consilio procerum et consiliariorum ipsius Regis Dacie et Regni eiusdem, super quibus sunt facte littere autentice sigillis dictorum Regum sigillate dignetur Sanctitas Vestra ad perpetuam roboris firmitatem acquisitiones et litteras huiusmodi super hoc confectas ex certa sciencia auctoritate apostolica confirmare, quarum litterarum tenores hic habentur originalibus dimissis in partibus propter passus periculosos et viarum discrimina. - Fiat per Cancellaria si fuerint parte non vocata confirmande. R.[3] Jtem cum idem Rex non nullis redditibus priuilegijs et honoribus ditauerit Monasterium in Asilo ordinis Cisterciensis Lundensis diocesis et ibidem infantes suos fecerit tumulari, habeatque magnam deuotionem ad monasterium supradictum. Supplicat Sanctitati Vestre quatinus omnia priuilegia data et concessa dicto Monasterio per ipsum Regem dignemini etiam ex certa scientia auctoritate apostolica confirmare, quorum priuilegiorum tenores hic habentur originalibus dimissis propter passus periculosos et viarum discrimina. - Fiat, dum tamen alias legitime constet. R.[4] Jtem Supplicat, quatinus eidem Regi dignemini indulgere ut in qualibet ecclesia cathedrali dictorum regnorum et terrarum suarum possit semel nominare et presentare auctoritate apostolica duas personas ydoneas quarum alteri prouideatur eadem auctoritate de dignitate personatu uel officio etiam si sit maior uel maius post episcopalem dignitatem et ad eam uel ipsum consueuerit quis per electionem assumi, alteri uero de canonicatu et prebenda vacantibus uel proxime uacaturis cum decreto clausula anteferri et alijs clausulis oportunis et alias ut in forma executione et cetera. - Fiat de vna persona in qualibet ad canonicatum et prebendam, et in sex ecclesijs quas elegerit eciam ad dignitatem et cetera. R.[5] Jtem Supplicat idem Rex, quatinus sibi et domine Blance Regine vxori sue dignemini indulgere, quod eorum quilibet ualeat eligere ydoneum confessorem qui eos et eorum quemlibet possit quando et quociens necesse eis fuerit absoluere et cum eis et eorum quolibet dispensare super quibuscunque peccatis et casibus sedi apostolice reseruatis, ac a pena et a culpa in quantum claues ecclesie se extendunt et penitenciam iniungere salutarem. - Habeant quod possint eligere confessorem sine prefinitione temporis qui de omnibus peccatis et cetera ut in forma. R.[6] Jtem cum eidem Regi a sede apostolica sit indultum quod quociens fit sermo in presencia ipsius Regis, sermonem faciens si sit Episcopus vnum annum, si uero sit alius inferior ab Episcopo. LX. dies auctoritate apostolica de indulgencia largiri possunt. dignetur Sanctitas Vestra ad huiusmodi largitionem indulgenciarum addere ultra eas aliqua prout vestre placuerit sanctitati. - Possit Episcopus vnum annum et .XL. dies alius inferior centum dies et cetera. R.[7] Jtem Supplicat quatinus Secretario suo Nicolao Marchi curato parochialis ecclesie Malmeghe Lundensis diocesis dignemini facere graciam specialem de canonicatu dignitate personatu uel officio eciam si sit maior uel maius post episcopalem dignitatem et ad eam uel ipsum consueuerit quis per electionem assumi in ecclesia Lundensi predicta vacantibus uel primo uacaturis sub expectatione prebende dignemini auctoritate apostolica misericorditer prouidere, non obstante quod dictam parochialem ecclesiam noscitur obtinere, cum acceptatione decreto et clausula anteferri et cum alijs non obstantibus et clausulis oportunis, Executione et cetera. - Fiat etiam de dignitate &c. R.[8] Jtem Supplicat quatinus Yuano Marquardi de canonicatu et prebenda ecclesie zuerinensis vacantibus uel vacaturis simili modo et cum clausulis oportunis et consuetis dignemini prouidere Executione et cetera. - Fiat. R.[9] Jtem quod absque periculo aliquo seu pena aliqua excommunicacionis suspencionis et interdicti idem Rex mittere possit per quosdam ad Soldanum et terras alias falcones ad vendendum pro exoneratione debitorum suorum quibus est grauiter oneratus maxime propter malas administrationes et contractus factos per Administratores regnorum suorum tempore pueritie ipsius, non obstantibus quibuscumque iuribus et constitutionibus super hoc tam per vos quam quoscumque predecessores vestros Romanos pontifices editis que et quibus hic habere dignemini pro expressis. - Fiat quociens voluerit usque ad quinquennium. R.[10] Jtem quod cum sit in partibus illis magna penuria seu indigentia notariorum, dignetur Sanctitas Vestra concedere, quod aliquis Episcopus nominandus ex parte dicti Regis habeat facultatem creandi .XXX:ta. notarios. auctoritate apostolica quos idem Rex duxerit nominandos uel alias de alio numero prout vestre placuerit sanctitati. - Fiat de viginti. R.[11] Jtem quod idem Rex possit facere celebrari coram se etiam ante diem, quociens propter arduas et ineuitabiles necessitates fuerit oportunum. - Fiat. R.[12] Jtem quod possit peregrinari ad sanctum Sepulcrum cum centum hominibus uel mittere centum homines peregre pro se ipso absque aliqua pena excommunicacionis suspensionis et interdicti non obstantibus quibuscumque constitucionibus vestris uel predecessorum uestrorum quas dignemini hic haberi pro expressis. - Fiat. R.[13] Jtem quod dominus Magnus Nicolaij Miles et Bertholdus caluus possint absolui etiam in eorum absencia cum suis familiaribus absque eo quod teneantur apud sedem apostolicam accedere ab aliquo Episcopo dicti Regni Suecie nominando ex parte dicti Regis pro eo quod iuerunt ad sanctum Sepulcrum domini absque aliqua licencia a sede apostolica obtenta. - Fiat R.[14] Jtem quod idem Rex ex deuotionis causa et pietatis affectu Capellam quandam Stocholmis in altero Malminum fundare intendit et dotare, quatinus Capellani ibidem constituendi cum fundata et dotata fuerit possint omnes pauperes in dicta villa decedentes libere sepeliri [d.v.s.: -lire] in eadem etiam irrequisitis Rectoribus ecclesiarum dicte ville. - Fiat saluo iure parrochialis ecclesie. R.[15] Jtem quod idem Rex possit libere recipere clericos omnium et singularum ciuitatum et diocesium regnorum et terrarum suarum ad obsequendum sibi et dictis [d.v.s.: omnibus?] successoribus suis absque licentia petita et obtenta a quibuscumque diocesium Episcopis et aliorum quorumcunque superiorum clericorum predictorum, quodque clerici insistentes obsequijs suis Regis uel Successorum suorum possint recipere fructus redditus et prouentus omnium beneficiorum suorum ecclesiasticorum existentium in dictis Regnis suis quamdiu insistant obsequijs supradictis. Executione et cetera. - Fiat de fruentibus in forma pro .XX. personis ad vitam dicti Regis. R.[16] Jtem dignetur Sanctitas Vestra eidem Regi concedere, quod quilibet Episcopus Regnorum suorum et dominiorum in Ciuitatibus et diocesibus usque ad .X. uel .XII. illegitime natos non obstante quocumque natalium defectu quem patiuntur nisi prouenerit ex incestu cum eis auctoritate apostolica possit dispensare misericorditer quos idem Rex duxerit nominandos uel alias de alio numero prout vestre placuerit sanctitati. - Possit ad nominacionem dicti Regis dispensare cum quatuor viginti ex soluto et soluta, et .XXX:ta. ex presbitero diacono vel subdiacono uel coniugatis. R.[17] Jtem quod dominis Magno lincopensi et Scarensi canonico Cappellano et Secretario suo presentium portitori et Swenoni de lothosia dicte Scariensis (!) ecclesie canonico concedere dignemini quatinus possint sibi eligere confessorem ydoneum qui eos auctoritate apostolica ualeat absoluere ab omnibus peccatis suis et a pena et a culpa in quantum claues ecclesie se extendunt et sibi imponere penitenciam salutarem. - Fiat in forma. scilicet in mortis articulo. R.[18] Jtem dignetur Sanctitas Vestra dispensare cum nobili viro Elauo Elaui quod possit contrahere matrimonium cum Girde filia domini Erlingi Wikundi que idem Elauo attingit in quarto gradu consanguinitatis cum idem Elauus sit multum generosus et nobilis de Regno Norwegie oriundus et ibidem sine scandalo sui generis non possit contrahere in toto ipso Regno secundum natales suos nisi cum hijs que sunt in propinquiori gradu consanguinitatis astricti. - Fiat. R.[19] Jtem quod Sanctitas Vestra indulgere dignetur quod quicunque fidelis uere penitens et confessus accesserit quolibet anno perpetuis futuris temporibus in quolibet festorum infrascriptorum ad capellam ipsius Regis in Stocholmis habeat certas indulgencias secundum solennitates et qualitates ipsorum festorum infrascriptorum per Sanctitatem Vestram moderandas prout eidem Sanctitati Vestre uidebitur faciendum, videlicet in festo Natiuitatis domini Stephani prothomartiris Johannis Euangeliste patroni dicti Regis sanctorum Jnnocencium Thome Cantuariensis et ipsorum Octauas Circumcisionis domini Epiphanie eiusdem et ipsius octauas Purificationis beate marie virginis Mathie apostoli Annunciationis dominice resurecxionis (!) eiusdem et ipsius octauas Philippi et Jacobi apostolorum, Johannis ante portam latinam Assentionis (!) domini et ipsius octauas Pentecostes et ipsius octauas Trinitatis Johannis baptiste Petri et Pauli apostolorum Marie Magdalene Jacobi apostoli Assumptionis beate Marie virginis et ipsius octauas Bartholomei apostoli Natiuitatis beate Marie et ipsius octauas Jnuentionis et Exaltationis sancte crucis Mathei apostoli et Euangeliste Michaelis Archangeli Simonis et Jude Omnium sanctorum Catherine Andree apostoli et ipsius octauas Nicolay Conceptionis beate Marie virginis et beati Thome apostoli. - Fiat in quolibet dictorum festorum de quadraginta diebus in Octauis et per Octauas decem. R. - Et quod transeat sine alia lectione. - Fiat. R.[20] Supplicat Sanctitati Vestre deuotissimus orator uester Magnus Augustini Ambassiator Serenissimi Principis domini Magni Suuecie Norwegie et Scanie Regis Jllustris, quatinus prouidis et honestis viris lamberto et Joachim fratribus germanis concedere dignemini, ut in villa Sundensi Zuerinensis diocesis in omnibus et singulis ecclesijs ipsius loci tam regularibus quam secularibus possint audire missas et diuina officia et recipientur ab eadem secundum formam constitutionis Alma mater ecclesia non obstante generali interdicto ibidem ex certis causis posito, cui tamen interdicto Lambertus et Joachim nullam causam nec occasionem dederunt Executione et cetera. - Fiat in forma. R.[21] Jtem Supplicat idem Magnus quatinus in personam dilecti sibi Anundi hergeri lincopensis diocesis clerici nullum adhuc beneficium ecclesiasticum assecuti graciam facientes specialem, de aliquo beneficio ecclesiastico cum cura uel sine cura spectante ad collationem prouisionem presentationem seu quamuis aliam dispositionem . . Episcopi Strenginensis si quod in ciuitate uel diocesi Strenginensi uacat ad presens uel primo uacauerit auctoritate sedis apostolice eidem dignemini misericorditer prouidere, cum acceptatione inhibitione reseruatione decreto et clausula anteferri et cum omnibus non obstantibus et clausulis oportunis et executione ut in forma. - Fiat et cetera. R. - Et quod transeat sine alia lectione. -Datum Auinione .VI. Jdus Septembris Anno Sexto.