SDHK-nr: 42496

Frater Henricus Iohannis Degnenhart olim prior conventus seu domus Holmensis ordinis fratrum predicatorum Upsalensis diocesis exponit, quod ipse, qui iam senio confectus existit et officium prioris in dicta domo per plures annos laudabiliter exercuit et nunc obsequiis et consolatione quadam indiget, cuperet quendam fratrem Olaum Pauli laicum conversum dicte domus, qui iam quinquagesimum vel circa etatis sue annum agit et sibi gratus existit, secum pro sua consolatione et obsequiis tenere et habere. Super quo supplicatur humiliter eidem sanctitati vestre pro parte ipsius exponentis, quatenus, ut dictum fratrem Olaum in sua societate seu familiaritate et pro suis obsequiis, ubicumque ipsum residere contigerit, tenere et habere libere et licite possit et valeat, ipseque Olaus absque alicuius superioris licentia secum manere et stare possit et valeat, ita quod interim, quod secum fuerit, alicui dicti ordinis superiori minime subiiciatur, sibi et eidem fratri Olao indulgere ac licentiam et liberam concedere facultatem non obstantibus constitutionibus et ordinationibus apostolicis ac domus seu conventus et ordinis predictorum statutis et consuetudinibus etiam iuramento etc. roboratis privilegiis quoque et indultis ac litteris apostolicis eidem ordini illiusque superioribus et personis communiter vel divisim etiam in forma brevis concessis, confirmatis et innovatis ceterisque contrariis quibuscumque dignemini de gratia speciali. Fiat de speciali. Mercurius regens. Et cum assistentia, que committatur preposito et decano ecclesie Arosiensis et eorum cuilibet in forma. Fiat. Mercurius.