SDHK No: 6709

Omnibus, quorum interest seu interesse poterit quomodolibet in futurum, Waldemarus Erikson miles salutem in Domino sempiternam. Nouerint vniuersi me a reuerendo in Christo patre domino Sighmundo, Dei gracia episcopo Strengenensi, et suo capitulo quadringentas marchas denariorum noue monete de pecunia pro fabrica ecclesie Strengenensis deputata mutuo recepisse et in rei veritate subleuasse in festo purificacionis beate virginis iam proxime venturo in promta pecunia persoluendas. Pro qua quidem summa pecunie bona mea predialia infrascripta, videlicet octo attongos terre in Ringhstadhum, tres attongos terre in Folaberghum, duos attongos terre in Fiskyaby, quatuor attongos terre in Hemblæstadhum, molendinum meum dictum Trana parochie Eneby ac quatuor attongos terre in Kætilstadhum in Kynd cum coloniis, agris, pascuis, pratis, piscariis, molendinis et molendinorum locis ac omnibus et singulis eorum pertinenciis, prope vel remote positis, secundum leges patrie inpignero, condicione que sequitur interiecta, quod si eadem pecunia infra predictum terminum soluta non fuerit, extunc ipsa predia cum fructibus, redditibus et quibuscumque aliis pensionibus sub illo anno exinde prouenientibus ecclesie Strengenensi cedant in perpetuum possidenda ad estimacionem nobilium virorum, dominorum Nicholai Abyornason et Karoli Vlfson militum, que quidem estimacio in hoc rata et firma per me ac heredes meos habebitur, ut in quanto memorata predia vltra valorem summe illius pecunie se extenderint, in tanto predicti dominus episcopus et suum capitulum nomine ecclesie michi soluere teneantur. Si vero prefati milites in premissis concordare nequiuerint, extunc venerabilis in Christo pater, dominus . ., diuina miseracione archiepiscopus Vpsalensis, quem ad hoc supra illos specialem eligo, id diffiniendi plenam habeat facultatem. In quorum omnium firmiorem euidenciam sigilla nobilium virorum, dominorum Nicholai Abyornason, Gøstaui Tunason, Karoli Vlfson, Johannis Knutzson, Petri Stigzson et Nicholai Akason militum vna cum meo proprio sigillo peto presentibus apponenda. Datum Strengenes anno Domini millesimo trecentesimo quinquagesimo quarto feria secunda proxima post dominicam inuocauit.