SDHK No: 6121

Omnibus Christi fidelibus præsentem literam visuris vel audituris Laurentius Michialsson, quondam procurator sororum S. Claræ, salutem in Domino sempiternam. Quoniam res gestæ literarum serie solent perhennari, idcirco tenore præsentium omnibus facio manifestum me religiosis personis et Christo devotis, supradictis sororibus S. Claræ ex debita deliberatione et consilio meorum hæredum septem solidos terræ in villa dicta Heelliby, parochia S. Trinitatis Upsaliæ, sitos, et duas partes domorum ibidem manentium cum agris, pratis et omnibus adiacentiis contulisse, iure perpetuo possidendos, alienata a me et meis hæredibus omni facultate prædictam terram in posterum revocandi. Insuper supellectilem meam et omnia, quæ habeo circa me, Deo me vocante, memoratæ sorores recipient et pro suis usibus reservabunt, etiam ad præsens eisdem assigno et committo duodecim pecora parva et magna, octo oves et quatuor sues, de quibus faciant quicquid velint, quibus etiam me ipsum vivum et mortuum recommendo. In cuius rei testimonium sigillum meum præsentibus est appensum. Datum anno Domini mccc quinquagesimo primo in die sanctarum virginum et martyrum Perpetuæ et Felicitatis.