SDHK-nr: 233

Londensi Archiepiscopo pro Petro Sanct. Genouefae Canonico.Placet pariter holocaustum, & placat, quod offertur de conscientia bona & fide non ficta. Id in qualibet aetate, conditione, & sexu Deus non respuit, qui in iuuenibus matutinum sacrificium approbat, & in senibus vespertinum. Circa hunc offerendi ritum sollicitus, & sedulus bonae indolis adolescens, Petrus vester, & amodo noster, super Montem Virginis Genouefae vinculis obedientiae colligatus, quid de se placabili hostia Dominus facturus sit patienter expectat: Artius & vt credimus, altius prepositum aggressus fuerat. Sed ne labor insolitus, & rigor austerus teneram aetatem reuerberaret, & deijceret, satius est ei saluari in Segor, quam periclitari in Excelso. Sine sui ac suorum ignominia, licite simul & libere diuertet ab oneribus dorsum suum, & ne manus eius circa hortos & agros in cophino deseruirent, lectioni saepius vacaturus, factus est nobiscum Clericus, vt clericis conformetur. Gaudeat super eo sancta paternitas vestra, & parentes eius in Domino consolentur, quoniam in Ecclesia Dei ex tali flore fructus vberes expectamus. Ego autem & fratres nostri, quicquid instructionis, dilectionis, & doctrinae poterimus, parati sumus ei impendere, materna saepius vbera, quam paterna verbera porrecturi.