SDHK-nr: 210

Alexander Papa III. Regibus & Principibus, & alijs Christi fidelibus, per regna Danorum, Noruuegensium, Guetomorum, & Gothorum(1) constitutis.Non parum animus noster affligitur, & amaritudine non modica & dolore torquetur, cum feritatem Estonum & aliorum paganorum illarum partium aduersus Dei fideles, & Christianae fidei cultores grauius, insurgere, & immaniter debacchari audimus, & Christiani nominis impugnare virtutem. Veruntamen laudamus & benedicimus Dominum, quod vos in fide Catholica, & in deuotione sacrosancta, Romanae Ecclesiae, quae omnium Ecclesiarum caput est, & magistra a Domine constituta, super omnes alias Ecclesias caelesti priuilegio obtinet principatum, immobili firmitate persistitis, & Christianae religionis vinculum & vnitatem seruatis. Vnde quoniam expedit officio nostro, ea quae ad corroborationem fidei, & animarum vestrarum noscuntur pertinere salutem, vobis sollicita exhortatione suggerere, & studiosius suadere, vniuersitatem vestram monemus & exhortamur in Domino, quatinus diuino cultui intendere, misericordiam & iustitiam & iudicium diligere, a rapinis & iniquis operibus abstinere, deuota Deo & accepta obsequia impendere, praedictae sacrosanctae Romanae Ecclesiae, tanquam matri & magistrae vestrae, debitum honorem & reuerentiam exhibere, Episcopis, sacerdotibus, & alijs praelatis vestris humiliter obedire, & eis decimas, primitias & oblationes, & alias iustitias suas reddere, & ipsos tanquam patres & pastores animarum vestrarum honorare modis omnibus studeatis, & iura eorum defendere, manu tenere propensius, & conseruare curetis, & armis caelestibus praemuniti, & Apostolicis exhortationibus confirmati ad defendendam Christianae fidei veritatem spiritu fortitudinis accingamini, taliter in brachio forti ad propagandam Christiani nominis religionem intendentes, vt victoriam de inimicis possitis consequi, & coronam iustitiae, quae vobis reposita est, patrante Domino, adipisci. Nos enim eis, qui aduersus saepe dictos paganos potenter & magnanimiter decertauerint, de peccatis suis, de quibus confessi fuerint & poenitentiam acceperint, remissionem vnius anni, confisi de misericordia Dei, & meritis Apostolorum Petri & Pauli, concedimus, sicut his qui sepulchrum Dominicum visitant concedere consueuimus. Illis ((autem)), qui in conflictu illo decesserint, omnium suorum, si poenitentiam acceperint, remissionem indulgemus peccatorum. Datum Tusculani III. Idus Septembris.