SDHK-nr: 186

Anastasius episcopus seruus seruorum dei. Carissimis in Christo filiis. S. Regi et vniuersis proceribus swechie. salutem et apostolicam benediccionem. Inter cetera in quibus diuina pietas ministerium sacrosancte Romane cui auctore deo presidemus ecclesie honorificare dignatur. Nichil est propter quod in graciarum accionem et creatoris laudem nostra mens propensius excitetur quam si per nos aut fratres nostros ecclesie sue terminos dilatari concedat et diuini semen eloquij per prouisionem sedis apostolice gratum sibi amet(1) fructum afferre Quod nimirum quia in aduentu venerabilis fratris nostri Nicolai episcopi albanensis ad uos per omnipotentis dei graciam conspicimus adimpletum. auctori omnium bonorum graciarum acciones exsoluimus et tam circa nos quam circa uos ipsius beneficium omnimodis commendamus. qui de tenebris et vmbra mortis vos vocauit in admirabile lumen suum. et cum essetis mortui peccato. conuiuificauit uos christo. Rogamus autem vt qui cepit in uobis opus bonum perficiat. et jta semper doctrine apostolice uos faciat adherere jta uos in corpore christi quod est ecclesia per compagem caritatis solidet et confirmet ut et quod fideliter credidistis ad salutem animarum uestrarum studeatis iugiter adimplere. et post deposicionem huius corruptibilis tabernaculi veniente ad iudicium domino. occurrere valeatis ei cum omnibus sanctis in virum perfectum in mensuram etatis plenitudinis christi; quod pro certo credimus deo faciente futurum si doctrinam apostolicam et predicacionem supradicti fratris nostri ante oculos mentis semper habentes studueritis factores esse verbi et non auditores tantum fallentes vosmetipsos Si quis enim. sicut ait apostolus. auditor est verbi et non factor. hic assimilabitur viro consideranti uultum natiuitatis sue in speculo. Considerauit enim se et abiit et continuo oblitus est qualis fuerit. Ne igitur de uobis hoc accidat. monemus vos et exhortamur in domino quatenus per eundem fratrem nostrum ymbre sacri eloquij irrigati fructum vite facere studeatis et cogitantes apud vos qualiter cum fueritis aliqando tenebre nunc sitis lux in domino. que sursum sunt sapiatis. non que super terram. et per verum noe ac ministros ipsius ab inundacione diluuij in archam ecclesie congregati precepta dominica et prefati fratris nostri statuta. de libertate ecclesiarum. matrimonio.(2) armis non portandis et aliis ad salutem populi spectantibus firmiter obseruetis Cernite pereuncia extra arche ambitum animalia. et in ea collecti immensas gracias exsoluite collectori et considerate apud vos benignitatem ipsius qui ut redimeret de manu inimici et de regionibus congregaret non despexit pro uobis cum adhuc peccatores essetis. vestiri carne. turpari cruce. multari morte. Et quoniam vos gratuita bonitate sua filios apostolorum et corporis sui membra constituit in eiusdem corporis vnione ae fidei catholice veritate immobiliter perdurate. Veneramini toto studio sicut incepistis matrem omnium fidelium sacrosanctam Romanam ecclesiam. et qui longa terrarum intercapedine ab ea distatis deuocione ac pio desiderio presentes ei semper estote Firmum quidem habemus et indubitabile quia si usque ad finem in obediencia eius et subiecciorie manseritis et ((statuta)) prefati fratris nostri et doctrinam apostolicam studueritis adimplere. de terrenis ad celestia. et de caducis ac transitoriis ad eterna semperque manencia pertingetis Censum autem quem in argumentum vestre deuocionis beato petro de terris vestris persoluendum annis singulis statuistis. fratribus nostris episcopis tribui faciatis. vt per eos sedi apostolice transmittatur. Quem profecto non tam ad nostram vtilitatem quam ad salutem animarum vestrarum exigimus dum vos interne deuocionis obsequium beati petri cupimus patrocinium optinere. Datum lateran. IIII:to kalendas decembris.