SDHK-nr: 191

In nomine sanctae & individuae Trinitatis. Fridericus divina favente Clementia Romanorum Imperator Augustus. In examine cuncta Dei conspicientes aequali, meritum fors credimus dantis & corroborantis. Credimus etiam ad Imperialem Majestatem nostram pertinere, totius Imperii curas, praecipueque omnium Sanctarum Dei Ecclesiarum commoda considerare, & omnia eis adversantia sub omni festinantia abolere, ne vel gravi incommoditate vilescant, vel qualibet nacta occasione, a pristino cultu & religione recedant, quatenus dum hoc pro amore, pariterque timore Dei fideliter peragimus, illorum qui bona sua pio affectu Deo contulerunt, meritis & gloria communicemus. Noverint igitur omnium Christi, Imperiique nostri fidelium tam praesens aetas, quam successura posteritas, qualiter dilectus noster Hartwicus Hammaburgensis Archiepiscopus obtulit Majestati nostrae privilegium Divi & Augustissimi Imper. Hludovici primi fundatoris & Constructoris Hammaburgensis Ecclesiae, supplicans nobis ut bona, possessiones, jura, immunitates, terminos, sicut praefatus gloriosissimus Imperator instruxit, nos aeternae stabilitatis vigore praedictae Ecclesiae confirmaremus. Nos itaque pia facta praedecessoris nostri clarius intuentes, & divinae dexterae opus per manum Christi sui completum debita affectione cordis amplectentes, quicquid in Hammaburgensi Ecclesia statuit, statuimus, quod donavit, donamus, & nostra Imperiali auctoritate confirmamus. In memoriam revocantes, omnibus tam futurae quam praesentis vitae fidelibus, quo cella Rodenach vocata, a sanctissimo Imperatore Carolo Magno praenominatae Ecclesiae sit donata, & cella Turholt in comitatu Flandriae sita, donatione Hludovici Imperatoris ad perennem Hammaburgensis Ecclesiae jurisdictionem debeat pertinere. Recolimus vero rem magna veneratione dignissimam, quod in eodem loco trans Albiam Hammaburch nuncupato, idem gloriosissimus Imperator Hludewicus proprii vigoris Archiepiscopalem & super omnes Ecclesias Danorum, Sueonum, Norwegiorum, Farriae, Gronlandonum, Hallingolandonum, Islandonum, Scredevindonum & omnium Septentrionalium partium metropolitanam sedem constituit, & in futurum omnibus casibus saepe dictae Ecclesiae obviare posset, ne quisquam Episcoporum aliquam sibi trans Albiam vel alicubi in praedicta parochia vindicare debeat potestatem, certo limite eam circumscripsit. Terminos itaque quos Imperator Hludovicus posuit, & eos quos Otto Imperator postmodum ex consilio Principum praefatae Ecclesiae designavit, juxta temporum aequam considerationem immutatos conservamus, & nostra Imperiali auctoritate confirmamus; quod sint videlicet termini ejusdem Ecclesiae ab Albia flumine deorsum, usque ad mare Oceanum, & sursum per Slavorum provinciam usque ad fluvium Pene, & per ejus decursum usque ad mare Orientale & per omnes praedictas Septentrionis nationes. Omnes quoque paludes infra sive juxta Albiam positas, cultas & incultas infra terminos ejusdem parochiae, sicut ab Imperatore Hludovico positae sunt, & nos ponimus ut trans Albiam se & sua ab incursu paganorum securius in his locis occultari queant. Et ut haec confirmationis auctoritas sui vigoris perpetuam obtineat firmitatem, praesentem inde paginam conscribi, & sigilli nostri impressione insigniri jussimus adhibitis idoneis testibus, quorum haec sunt nomina. Arnoldus Maguntinensis Archiepiscopus, Everhardus Bambergensis Episcopus, Geberhardus Wirzebergensis Episcopus, Albertus Aquensis praepositus, Gerhardus Magdeburgensis praepositus, Fridericus Dux Sueonum, Chonradus Palatinus Comes de Rheno, Hludowicus provincialis Comes Thurindiae, Marquardus de Gumbach.Signum Domini Friderici Romanorum Imperatoris invictissimi. (Namnteckningen.)Ego Reinaldus Cancellarius vice Maguntinensis Archiepiscopi et Archicancellarii recognovi. Data Franckenwort XVII. kalend. Aprilis. Indictione VI. anno ab incarnatione Domini Millesimo, centesimo quinquagesimo octavo, Regnante Domino Friderico Romanorum Imperatore Augusto, Anno Regni ejus VI. Imperii vero III.