SDHK-nr: 211

Alexander Papa III. vniuersis tam clericis quam laicis Lingacopensis Episcopatus. Decet vniuersitatem vestram, quae ad perfectionem virtutum & salutem pertinent animarum, toto studio cogitare, & ea voluntario effectu perficere, per quae gratiam possitis altissimi acquirere, & ad aeternae felicitatis gloriam cum auxilio diuini numinis peruenire. Caeterum quoniam sine obedientiae virtute nemo Deo perfecte potest placere, aut acceptum seruitium reddere, per Apostolica vobis scripta praecipiendo mandamus & mandando praecipimus, quatinus venerabili fratri nostro Coloni Episcopo vestro, sicut bonae memoriae Giloni praedecessori suo fecisse noscimini, omnimodam obedientiam & reuerentiam impendatis, & in his quae Dei sunt, & ad vestrarum animarum spectant salutem, monitis & mandatis eius humiliter parere curetis, & ei de iustitijs suis integre, & plenarie respondeatis: ita quod apud Deum pro humilitate & obedientia vestra peccatorum vestrorum veniam & gloriam valeatis promereri aeternam. Si qui autem vestrum ei contumaces vel rebelles extiterint, sententiam quam idem Episcopus propter hos in eos rationabiliter tulerit, auctore Domino ratam & firmam habebimus. Datum Tuscul. XV. kalend. Octob.