SDHK-nr: 2680

Omnibus presentes litteras jnspecturis Waldemarus dei gracia dux Sveorum salutem in domino sempiternam. Ea que judicio vel concordia terminantur firma debent persistere, et ne in recidive(1) contencionis scrupulum relabantur, litterarum Convenit presidio communiri. Ea propter notum facimus vniuersis, quod venerabilis Pater dominus Jsrael, dei gracia Episcopus Arosiensis, ac Nobilis vir dominus Birgerus Pætarsson(2) consobrinus suus, sub Anno domini M. CCC. XV. in ebdomada Trinitatis, apud Stocholmiam in nostra presencia constituti, super divisione hereditaria bonorum post dominum Johannem dictum Angelum, fratrem olim ipsius Episcopi, relictorum in øsgothia(3) et Smalandhia(4), de nostro et aliorum discretorum consilio habita inter eos composicione amicabili, taliter concordarunt, videlicet quod ipse dominus Jsrael Episcopus memoratus, verus heres ipsius domini Johannis germani sui, duas partes bonorum predictorum, que dictus dominus Johannes Angelus in øsgothia(3) et Smalandh(4) post se moriens reliquit, predicto domino B. consobrino suo, tamquam suo vero et legittimo heredi, si tamen lex hoc dicat, quod ipse dominus B. et non proles domini Folkonis succedere debeat ipsi Episcopo morienti, sub condicione que sequitur, possidendas dimisit, scilicet, quod ipse dominus B. ad restitucionem omnium bonorum, que de dicta parte ad Episcopum, secundum huius divisionis seriem ac parcium concordiam devoluta, post mortem antedicti domini Johannis levaverat, preter sortem integraliter teneatur et sicut in bonis receperit(5) duas partes, sic ad solucionem duarum parcium omnium debitorum silicet et legatorum, ac eciam exequiarum et funeralium dicti domini Johannis(6), que racionabiliter computari poterint, pro rata bonorum osgothie(7) et smalandie existencium tenebitur obligatus, quam quidem solucionem omnium predictorum integraliter solvere tenebitur bona fide. Jtem quod liberum sit domino Episcopo memorato, de sua tercia parte facere, vendere, donare ac quomodolibet voluerit ipsa bona pro anima sua, prout inspiratum sibi fuerit, ordinare, omni prorsus facultate exempta sepedicto domino B. ac ipsius Episcopi heredibus quomodolibet impediendi ordinacionem ipsius, quam de sua tercia parte in vita sua duxerit faciendam, salvo nihilominus omni jure prolis domini Fulkonis, si quod eis competat in bonis memoratis, in quo si ita est, nullum eis volumus preiudicium generari. Jtem promisit in nostra presencia predictus dominus B. quod negocia domini Episcopi sepefati, super quibus ex parte sua fuerit requisitus, fideliter prosequetur et efficaciter promovebit. Jn premisse igitur composicionis et nostre confirmacionis evidenciam et munimen, sigillum nostrum ad peticionem et instanciam dominorum Episcopi et B. predictorum(8) una cum sigillis eorundem presentibus duximus apponendum. Datum Anno Tempore et loco prenotatis.