SDHK-nr: 6000

In nomine Domini amen. Nos Kætilløgis Pætærsdotter et Nicholaus Johannis, filius eius, mortis ac nouissimorum nostrorum non immemores, ad honorem omnipotentis Dei et in nostrarum refrigerium animarum damus et legamus in modum, qui sequitur, nostrum testamentum: primo videlicet ecclesie Lyncopensi curiam nostram ibidem ad augmentacionem prebende, quam felicis memorie dominus Kanutus Jonsson in eadem fundauit, tali condicione preseruata, quod clericus, quicunque sit, eandem prebendam pro tempore obtinens singulis septimanis tres missas, sicut in littera testamentali predicti domini K[anuti] est expressum, celebrandas ad perpetuum tempus infallibiliter pro benefactoribus obseruare teneatur, quarum nos participes fieri pie Confidimus et speramus, eciam sub ista condicione, quod, si Deus me Nicholaum ad aliud beneficium in eadem ecclesia obtinendum vocauerit, vel si me mori prius, ipsa matre mea K. superstite, Deus prouiderit, extunc ego vel ipsa clerico, qui eandem prebendam obtinuerit, pro participacione predictarum missarum tres marcas denariorum annuatim diebus nostris pro predicta curia dare teneamur et post dies nostros curia prefata ad sepedictam irreuocabiliter diuoluetur. Item ecclesie Klokkarike et ad mensam sacerdotis ibidem quartam partem attungi terre in Thækte cum omnibus suis adiacenciis, de qua duo thynones et due ore denariorum proueniunt annuatim, item ad augmentacionem inuentarii in curia sacerdotis ibidem decem marcas in competentibus vtensilibus estimandas, tali condicione, quod predictus sacerdos, quicumque pro tempore ibidem fuerit, pro eiusdem inuentarii sui augmentatoribus bis in anno, videlicet in proxima feria secunda post dominicam quasi modo geniti et in secunda feria proxima post diem sancti Michaelis archangeli commemoracionem in missis et vigiliis deuotis facere teneatur. In cuius rei testimonium sigilla nostra vna cum sigillis nostrorum karissimorum Olaui de Berghum, Botwidi Ragwaldzson, domini Birgheri Karlsson, Petri Karlsson et Bodgeri Karlsson presentibus sunt appensa. Datum anno Domini m°ccc° quinquagesimo in vigilia beati Johannis baptiste.