SDHK-nr: 1776

Vniuersis presentes litteras Jnspecturis, Jsrael petri filius, Canonicus vpsalensis, salutem in domino sempiternam. Naturale est et racioni eonsentaneum, vt diligentem se quisque diligat, et beneficij accepti immemor nequaquam existat, Jdcirco hac inductus consideracione beneficiorum atque dileccionum, michi per venerabiles patres, vpsalensis ecclesie videlicet prelatos, a retroactis temporibus, beneuole factos, inmemor esse nolens Tenore presencium ad noticiam omnium volo deuenire, quod ob remedium anime mee parentumque meorum, ex consensu et voluntate expressa, dilecti fratris mej, Domini Birgeri legiferi vplandensis Curiam meam Hambra cui duodecim ore terre subiacent, secundum computacionem wlgarem et sedecim solidos terre in villa Æluerstum, parochie botuidhe kirkiu, dyocesis strengienensis situata, cum agris, pratis, siluis et piscarijs, et omnibus alijs mobilibus et inmobilibus bonis, ad illa qualitercumque pertinentibus, Titulo donacionis inter viuos facte, do, confero, et assigno, ecclesie vpsalensi, Jure perpetuo possidenda, Jus omne, proprietatem, dominium, et possessionem michi in predicta Curia Hambra, predioque Æluerstum supradictis, ac alijs omnibus et singulis, in eisdem bonis vsque ad hec qualitercumque attinentibus, in ecclesiam vpsalensem exnunc transferens, et translata esse denuncians per presentes, Que omnia in manibus Reuerendi patris domini Mei Nicolai dej gracia, eiusdem ecclesie archiepiscopi, presentibus dilecto fratre meo predicto, domino Birgero legifero, Ac alijs quampluribus discretis, libere dimisi et eidem nomine ecclesie vpsalensis pleno jure assignaui, Jn huius autem mee donacionis dimissionis et assignacionis euidenciam. Memoratique fratris mej domini Birgeri legiferi, expressi consensus testimonium vna cum sigillo meo, sigillum ipsius presentibus est appensum, Actum apud ecclesiam Bredh, anno domini Millesimo. ducentesimo. Nonagesimo, Octauo, Sabbato ante Dominicam passionis proximo.