SDHK-nr: 18935

Humillima nostri recommendacione cum omnimoda reuerencia tam debitis quam deuotis in Domino premissis. Reuerendissime pater! Quamuis nobis seruitoribus vestris cum omni fidei sinceritate et cordis deuocione paternitati vestre pro multis humanitatibus, fauoribus, consiliis et promocionibus hic Constancie existentibus multipharie multisque modis impensis exintimis congruat regraciari, multo tamen amplius pro hiis, que in partibus in conspectu regie maiestatis ac procerum suorum contra nos insontes, teste Deo, detractorum lingwa venenata seueriter concitate, vt certa relacione dudum didicimus, magnanimiter gesseratis, nos in verbo veritatis excusando et excusatos haberi obsecrando, profitemur nos teneri et flexis genibus offerimus ad omnimodas debitas et deuotas graciarum acciones et ad perhennem iugemque paternitatis vestre persone quoad vixerimus famulatum et in omnibus que poterimus ad dominum Deum pro vestra salute deuocionem, supplente nostrum defectum omnium bonorum eodem largitore, supplicantes humiliter et instanter quatenus amore illius, qui omnium oppressorum releuator(um) est mitissimus, loco et tempore se offerentibus, dignemini ascultare, an eiusdem domini nostri regis serenissimi motus animi adhuc contra nos efferbeat et si sic per repetitam vestre paternitatis strennuam intercessionem eundem nobis placare dignemini et reconciliare, concurrentibus vna vobiscum amicis nostris, si qui pro tempore fuerint presentes, videlicet fratribus mei Siggonis domino Kanuto milite et Benedicto et domino Cristiærno Nicolai milite et domino Aruido capelano eiusdem serenitatis regie et aliis, quos ad hoc videritis vocandum, et quid in premissis efficere poterit vestra paternitas, nobis propter Deum rescribere dignetur sine mora, nam a quibusdam amicis nobis consultum fuerat vt non sine assecuracione congrua coram oculis maiestatis sue presumeremus aliqualiter comparere. Item de statu domini S. satis miserabili, quomodo iam propter retardatam solucionem expensarum hic factarum reinciderat sentenciam excommvnicacionis ad valuas ecclesiarum publicatam et quomodo super ecclesia Caminensi molestatur, quam hic Constancie a domino Gregorio xij suo in tempore sic nominato practica satis mirabili impetrarat, quia non dubitamus dominum N. Capellanum vestrum vobis scribere, breuitatis causa pertransimus de presenti, vnde cum nos premisse displicencie pretextu non ausi fuimus nec audemus domino nostro regi quidquam in hiis materiis scribere, videat paternitas vestra quid congruat et quid expediat in eisdem. Item xviij die mensis Junii cum magna difficultate ambasiatores Hyspanorum seu Castelle sacro concilio fuerunt incorporati, obedienciam Petro de Luna subtrahentes omnemque processum contra eum factum et continuatum a tempore vnionis Arragonum, qui iam pendet in tempore ferende sentencie, solenniter approbantes, post cuius deieccionem, breuiter dante Domino fiendam, insistetur reformacioni primum pape et curie sue et post hoc ad eleccionis negocium procedetur, quamuis nonnulli ordine prepostero ad eandem procedere sunt conati prout in quadam cedula videre poteritis luculenter. Altissimus in sua gracia paternitatem vestram dirigat et conseruet feliciter et longeue. Item mittimus domino nostro R. literas nostras tenoris huius cedule intercluse, quam, si paternitati vestre placet, poteritis eiusdem Serenitati presentare.