SDHK-nr: 16609

Omnibus presens scriptum cernentibus Magnus Baad, aduocatus Lundensis, Michael Ingemari dictus Diægn, aduocatus in quarta parte ciuitatis ex parte domini archiepiscopi Lundensis, Johannes Hennikini, Jonas Andersson, proconsules, Olauus Borre, Johannes Pethersson et Paulus Torstænsson, consules et ciues Lundenses, salutem in Domino sempiternam. Notum facimus vniuersis presentibus et futuris quod sub anno Domini mcdquinto, quinta feria ante diem beati Thome apostoli, constituta personaliter in placito nostro ciuili Lundensi Lucia Øndersdather, relicta Nicolai Petri dicti Vinter, dudum ciuis Lundensis, discreto viro Cristiarno Petri, conciui nostro et genero suo, presencium ostensori, quandam curiam in parrochia beati Clementis, apud nos sitam, in qua Henricus Hermensson monetarius dudum habitauit, quam quidem curiam dictus Nicolaus Vinter, maritus eiusdem Lucie, a quodam Dauid, dudum villano in Hælsinborgh, herede cuiusdam Michaelis Petri, quondam proconsulis [in] Hælsinburgh, justo empcionis titulo legaliter acquisiuit prout in apertis literis et super hoc confectis plenius continetur, cum omnibus et singulis prefate curie adiacenciis, videlicet fundo, pomerio, domibus ceterisque proprietatibus et spaciis vniuersis, nullis penitus exceptis, et cum omni jure suo nobis presentibus et aliis pluribus fidedignis scotauit, alienauit et in manus libere et legaliter assignauit, jure perpetuo possidendam, recognoscens se plenum et sufficiens precium a dicto Cristerno Petri pro memorata curia integre subleuasse, ita quod reddidit se contentam, vnde obligauit se et heredes suos ad apropriandum libera[n]dum, et disbrigandum eidem Cristierno et suis heredibus curiam antedictam cum suis adiacenciis vt premittitur vniuersis ab impeticionibus et alloqucionibus quorumcumque presencium et inposterum futurorum; insuper promisit predicta Lucia in bona fide sua quod si alie antique littere, super dicta curia date, inuente fuerint inposterum, exceptis litens apertis dicto Cristerno in dicto placito ciuili publice resignatis, nullius sint efficacie vel valoris. Quod coram omnibus, quorum interest vel interfuerit, prout vidimus et audiuimus tenore presencium publice protestamur. In cuius protestacionis et rei testimonium sigilla nostra presentibus sunt appensa. Datum anno, die et loco supradictis.