SDHK-nr: 275

Vniuersis catholice matris ecclesie filiis tam presentibus quam futuris suethie regnum inhabitantibus. O. superni regis miseracione sacrosancte upsalensis ecclesie archiepiscopus in eo qui omnium est salus salutem & magis in deo condere quam in homine. benedictus deus pater domini nostri ihesu christi pater misericordiarum & deus tocius consolacionis qui nos desolatos non dereliquid. sed misericors in omni tribulacione nostra nos misericorditer ex alto uisitauit. qui nos in superlatiuo gradu super capita hominum constituens. pastorali dignitate decorauit. vnde creatori in omnibus & super omnia laudes & gracias digne referimus in perpetuum. iusticie & ueritati fideliter assistentes. a deo gratis accepta pro deo uolumus gratis impendere uniuersis. talia decent prelatos. et eosdem corona mirifice coram deo credimus decorare. Nos itaque freti rerum discrecione patrum ordoxorum uestigia sequentes que in diocesi nostra secundum decretorum instituciones tempore nostro instituuntur uolumus consolidare. & canonice confirmare. decetero notum fiat uniuersis. que ad sustentacionem canonicorum nostre metropolis esse. quos pro deo nouimus pondus diei & estus sustentare. mansionem quandam que housbuj nominatur. igitur non pecunia nostre ecclesie set pocius propria facultate nouimus adquisitam ad nostra peccata redimenda concedimus inperpetuum. & ne super hoc ulla aput aliquos oriatur ambiguitas inposterum. illud sigilli nostri priuilegio confirmamus. & corroboramus. Si quis autem contumax & deo contrarius contra hanc donacionem temere uenire presumserit. ab omni diuino officio separetur. & uinculo anathematis absque dubio innectitur Preterea qui hanc institucionem ratam & inconuulsam affectant permanere. nostram domini nostri ihesu christi & sancte marie & omnium sanctorum & nostram benedictionem consequatur inperpetuum; Valete.