SDHK-nr: 6550

Omnibus presens scriptum cernentibus Folko Patersson in Rythe salutem in Domino sempiternam. Nouerint vniuersi tam posteri quam presentes me dilecte consorti mee Cristine Jonsdotter dimidietatem bonorum meorum mobilium et immobilium, que michi iure hereditario per mortem dilecti patris mei in Dyuraberghum successerunt, cum agris, pratis, siluis et paschuis necnon et singulis eorundem adiacenciis, quibuscumque nominibus censeantur, racione dotalicii dicti morghungaw rite et racionabiliter contulisse, predictam eciam donacionem ex consensu heredum meorum cum bonis et prediis de ualore centum marcharum denariorum monete vsualis estimacione precii predictorum bonorum, ut ex antiquo consuetum fuerat, obseruata beniuole aughmentando seruatis condicionibus infra scriptis, quod si inter nos Deo annuente liberos procreari contigerit, donacio predicta iure matrimoniali eisdem cedat possidenda, si autem, quod Deus auertat, ipsam sine liberis discedere contigerit me superstite uel me mortuo ipsa superuixerit, bona antedicta ad possessionem superuiuentis puram et pacificam absque redempcione qualibet deuuluantur. In cuius rei euidenciam et testimonium sigilla nobilium, videlicet domini Aringislonis Sunason, domini Karoli Tukason et domini Laurencii Germunsson militum, Halstani Pætersson, Nicholai Bændiksson et Magni Haconsson, qui huic facto presentes fuerunt, vna cum proprio sigillo presentibus sunt appensa. Datum Rydh anno Domini m°cccl tercio feria sexta proxima ante festum beati Marchi ewangeliste.